Vawiin hian Lawngtlai Central YLA Hall ah Fire Prevention Week 2015 hawnna Inkhawm neih a ni a Pu. J. Hmingthanmawia Lawngtlai Bawrhsap chu khuallian a ni.

Khuallian chuan thingkung leh thlai hring te hi mihringte nunna atan a thil pawimawh heng; Boruak thianghlim, Tuihna, Sik leh sa nuam min pe tu an ni a, mihringte chaw bulpui ber ber pawh thlai hring te bawk an ni. Hei vang hian thing leh mau, kan ram ngaw neih chhunte kan duat tur a ni a, an tel lova mihringte hi kan nun theih bik loh avangin ram tikangtu chuan mihring nunna pawh a tikang a ni, a ti. Zirlai naupang leh tlawmngai pawlte, ram leh hnam ngaihsaktu khua leh tui tha zawng zawng ten ram kang tur ven leh a tikangtu ni lo tura beih hi kan mawhphurhna ani. Sawrkarin theihtawp chhuaha ram kang lo tur a hma a lak laia lo tikang lui an awm a nih phei chuan an phu tawka hrem ngei tur a ni ang tiin kalkhawm te hmaah a tarlang bawk. Fire Prevention Week 2015 hawnna Inkhawm ah hian LADC EM Pu. Lallura chinzah pawh in thu a sawi a, LADC a Forest Department RO Albert Lalrinzuala pawhin ram kang that loh zia a lem nena entirin kalkhawmte a zirtir bakah Natural Environment Committee Lawngtlai District-in Paper an buatsaih chu zirhona neih a ni bawk.

He inkhawm hi Pu MZ Singson, DCF (Wildlife) Lawngtlai District in a kaihruai a, Lai Idol 2014 Linda Lalchhanhimi’n kalkhawmte chu zaiin a awi bawk a ni.

He hunah hian khawpui chhunga zirlai naupang, tlawwmngai pawl, chanchinbumi leh khawtlang hruaitute an kal kim hle a ni.