India ram in zalenna a hmun champha (Independence Day) vawi 68 na Lawngtlai ah ropui taka lawm a ni a, he hunah hian Minister of State for AH& Vety Pu C. Ngunlianchunga chu Khuallian niin hnam puanzar chibai buktute a chhang let.

Thu sawiin Khuallian chuan zalenna hi hmasawnna bulthut a ni a, awpbeh a awm ram dingchhuak an awm meuh lo, hei vang hian India ram in zalenna a hmuh champha a lo thlen hian khua leh tui ten zalenna hlutzia hre thar leh in zalenna sualtute leh ram hruaitute; an theih na zawng zawng hlan a hun hmangtute kan zah in kan chawimawi tur a ni a ti a. Khawvel hriata India ram ram ropui taka a lo dinchhuah theih na chhan hi chung mite thawh rah chu a ni tih i hre thar leh ang u.

Hmasawnna hrang hrang kan neih mek te tarlangin Minister chuan Mizoram ah Vawk tihpun nan Vawkpui 200 dah theih na tur farm Thingsulthliah ah leh Selesih ah sak mek a ni a, tunah hian NLUP hnuaiah Vawk note 50000 chuang leh RKVY hnuaiah 2000 chuang sem tura ruahmanna siam mek a ni. Tin, Ar note a kan in todelh theih nan Ramrikawn ah Ar keu tirna lianzawk leh tha zawk peihfel tep a ni a, Bawng chi tha chi pawh hun reilote ah lakluh leh tura hma lak a ni. Thalaite hmakhua ngaiin sawrkar chuan hmasawnna hna a thawk mek a, vawiin a Independence Day kan lawmna Central YLA field ngei pawh hi reilo te ah Phullem phah tum a ni a ti. Hei bakah hian khuallian hian Mizoram in hmasawnna thar a hmuh mek thil tam tak a tarlang bawk.

Khuallian hian India President aiawh in Tv. Ramdinthara (L) S/o L. Lalrinawma Lawngtlai III hnenah huaisen lawmman Sarvottam Jeevan Raksha Padak chu a hlan bawk a, Tv. Ramdinthara hian 31.3.2012 khan Chhimtuipui-a a thianpa tuitla a chhanna lamah a nunna a chan a, huaisen lawmman hian Medal, Thu chei leh pawisa fai Rs. 1,00,000 a kengtel a, a nu leh a pa ten lawmman hi an dawng a ni.

Independence Day lawmnaah hian Parade Contingent 24 ten Parade Commander SI Tlircheuva kaihhruaina hnuaiah hnam puanzar chibai an buk a, an zinga 6 te hi Arm Contingent 1, Scout and Guide Contingent 5 leh School Contingent 18 an ni a, heng contingent ti tha te hnenah hian Khuallian hian lawmman semna nei nghal in lawmman dawngtute chu a hnuai a mi ang hi an ni.

School Contingent :

1. Downtown English School Boys

2. Don Bosco School

3. Jehova Jire English School

Scout and Guides :

1. Don Bosco Scout

2. Downtown English School Scout

3. Ngurnunsangi English School Guides.

Khuallian hian Independence Day puala Badminton intihsiakna lawmman pawh a sem nghal bawk a, Football intihsiamna erawh chu vawiin chawhnu lama Final Match khelh chauh tur a nih avangin hun dangah lawmman hlanna neih leh tur a ni.

Chawhma lama Independence Day lawmna inkhawm neih zawh hnu hian khuallian chuan sawm bikte pualin Circuit House ah At home a buatsaih bawk.