Vawiin khan Lawngtlai Police te chuan SP Conference Hall-ah Police Headquarters Mizoram thuchhuak angin Mizoram Police din champha phak (rising day) an hmang.
Kumin atanga hman tan tura tih Mizoram Police Rising Day hi January ni 21 a ni a. Kumin hian Pathianni a nih avangin Lawngtlai Police te chuan vawiin khan an hmang ta a ni.
Lawngtlaia Mizoram Police Rising Day lawmna inkhawm hi Addl SP Pu VL Lura Hauzel chuan kaihruaiin, Police te tana hun vawn dik pawimawhzia te, duty laia zu in tur a nih loh thu leh mahni aia senior zawkte thu ngaih pawimawh tur a nih thu a sawi a. Lawngtlai SDPO Pu Victor Zothansanga pawhin Mizoram Police Station tha thlanna top 3-a Lawngtlai Police Station a lang pha chu kan zavaia thawh rah a ni tiin, lawmawm a tih thu a sawi a. Police chu a displine a tha tur a ni a, mi dang tanpuitu nih kan tum tlat tur a ni tiin, rising day chu intuaitharna ni atan hmang theuh turin police kal khawmte chu a chah a ni.
He hunah hian Pu HT Sapsanga MPS (Rtd) chuan Mizoram Police lo indin chhoh dan leh hotu hmasa entawn tlak tak takte chanchin a sawi a. Pu Lalhlana S.I. (Rtd) pawhin hmanlai police leh tunlai police te khaikhinna thu ngaihnawm tak a sawi bawk.
Lawngtlai District chhungah hian police station 5 leh police out post 2 a awm a. Tun dinhmunah he'ng police station leh out post-ah te hian thawktu 62 leh MAP 17 an awm mek a ni.
