Vawiin khan Lawngtlai DC Conference Hall-ah Swachh Bharat Mission (Urban) leh Swachh Surveksan 2018 chungchang zir hona (workshop) buatsaih a ni.

He workshop hi Lawngtlai SDO (Sadar) Pi Rochuangkimi Khenglawt MCS chuan a kaihruai a. District Bawrhsap Dr Arun T., IAS chuan bawlhhlawh sawngbawl dan dik (solid waste management) a lem nen entirin a sawi fiah a. NULM Manager Pi VL Ramnunsangi chuan Swachh Bharat Mission (Urban) leh Swachh Surveksan 2018 a sawi fiah a. Swachh Survekshan chungchanga inbuatsaih dan tur leh hma lak dan tur hrang hrang sawi ho a ni bawk.

Swachh Survekshan 2018 hi khawpui fai endikna (cleanliness survey) a ni a. India rama khawpui lian, mihring nuai khat chuang awmna khawpui 500 leh mihring nuai khat awm tlin lohna khawpui 3541 te faina kawnga an dinhmun endikna tur a ni. Khawpui bawlhhlawh khawn khawm leh paih dan te, faina leh thianghlimna kawnga hmasawn dan te, faina beihpui thlak dan leh vantlang inthiarna hmun enkawl dan atang te’n khawpui hi en dik a ni dawn a. Endiktute hian naktuk hian Lawngtlai an lo lut ang.

He workshop-ah hian LADC-a Sanitation Officer te, Lawngtlai khawpui chhunga VCP zawng zawng te, YLA branch tin hruaitute, LADC hnuaia hmunphiat leh DAY-NULM hnuaia ALF hruaitute an tel.