Ni 21.1.2018 (Pathianni)-a Mizoram lo zin Union Minister of State for Drinking Water & Sanitation Pu Ramesh C. Jigajinagi hovin vawiin khan Chief Secretary’s Conference Hall, New Secretariat Complex-ah Mizoram PHE Minister Pu Zodintluanga leh PHE E-in-C, CE leh officials dangte nen Mizoramah tui thianghlim sem leh SBM(Gramin) hnuaia hmalakna hrang hrang an sawiho. 

Union MoS Pu Ramesh C. Jigajinagi chuan Mizorama a cham chhungin mipuite tana tui thianghlim pek leh faina lama sorkar hmalaknate a hmunah a rawn hmu thei chu a lawm hle thu leh a theih anga rangin Union Secretary hova team a rawn tirh tur thu sawiin PHE officials ten harsatna an neih hrang hrangte sutkian dan tur chipchiar takin lo sawipui  turin a chah. Kumin March thlaah Mizoram chu ODF State-ah puan a ni thei tur chu a lawmawm hle a, bawlhhlawh sawngbawl dan tur (waste management)-ah erawh nasa takin hmalak lehzual a ngai a ni, a ti. Ruahtui khawl (rainwater harvesting)-ah department leh mipuite hmalakna a entawntlak hlea a hriat thu sawiin Union MoS chuan hei hi uar lehzuala kalpui a nih theih nan sorkar laipui chuan tanpui a inhuam hle a, project rawn thehlut turin a hrilh bawk. 

PHE Minister Pu Zodintluanga pawhin thu sawiin Mizoramah chuan kum 25 kalta atang khan faina lamah hmalak tan a ni tawh a, tuna sorkar laipuiin ‘Swacch Bharat’ a kalpui mek pawh Mizo mipuite chuan an zawm tha hle a, rampuma state fai ber nih tumin sorkar, tlawmngai pawl leh mipuite tanghovin chak taka hmalak mek zel a ni, a ti. Mizorama khaw fai bera thlan Biate khua phei chu Asia-ah khaw fai ber nih tumin hma an la mek tih a sawi bawk. Mizoram-ah khawlaiah bawlhhlawh paih hremna (littering fine) pawh danah siam ni tawhin hei hi Aizawl Municipal Corporation kutah dah a ni dawn, a ti. 

Mizoram PHE officials ten sorkar laipui atang sum an hmuh turah harsatna an tawhte an thlen chu Minister rawn zuitu Under Secretary, Drinking Water & Sanitation Pu Sunil Kumar chuan sum sanction chu pekchhuah theihin dah a ni reng tawh a, PHE Department-in sum hmuh tawhte hman dan report leh utilization certificate te an thehluh veleh pek a nih mai tur thuin a chhang. 

Vawiin meeting hi Commissioner & Secretary Pu KT Beicho-in a kaihruai a; PHE CE Pu Lallunghnema leh PHE SE (Monitoring) Pu Anoop Chhetri ten department hmalakna hrang hrang report an tarlanah 

1.       Rural Water Supply as on Dec. 2017 (50 LPCD) :

Total no. of villages – 738

Fully covered habitations – 153 (20.73%)

Partially covered habitations – 585 (79.27%) 

2.       Rural Water Supply as on Dec. 2017 (44 LPCD) :

Total no. of villages – 738

Fully covered habitations – 470 (63.69%)

Partially covered habitations – 268 (36.31%) 

3.       Individual Household Latrines (IHHL) :

No. of districts - 8

Coverage upto date – 89.58%

ODF Districts – 6

Verified ODF District – 4 (+ 2 under process of certification)

No. of toilets yet to be constructed - 8137