Vawiin khan Lawngtlai Central YLA Hall ah Urban Development and Poverty Alleviation Department bultumin Central Scheme thar Rajiv Awas Yojana chung chang inhrilhhriatna neih a ni.

Khawpui a miretheite (Slum People) chenna in a thlawn a sak sakna tur programme Rajiv Awas Yojana hi Central Sawrkar in kum 2009 khan a kalpui tan a, Mizoram-ah kum 2013 ah bul tan ve niin UD&PA Department chu Nodal Department a ni a, a bul tan nan Aizawl leh Lunglei District ah zirchianna (Preliminary Survey) neih tawh niin report buaipui mek a ni a, District dangah neih chhunzawm leh niin vawiin khan Lawngtlaiah neih ve a ni.

He Scheme in a tum ber chu khawpuia mi rethei veng tih bo a ni a, amaherawh chu Mizoram khawpui te ah a hranpa a mirethei veng (Slum Area) a awm loh vangin Central Sawrkar chuan veng chhunga chenna In mumal lo 10 chin chunglam awmna apiang chu Slum Pocket a puan phalna NE States dangte nen a kan hman tur a rawn siam a, hemi zul zui hian Mizoramah pawh ruahmanna hi kalpui tur a ni.

District khawpui tina zirchianna behchhanin Central Sawrkar ah Slum Free City Plan of Action thehluh tur a ni a, Central in dawng tlaka a ngaih te chuan a thlawn in In sakna cheng nuainga theuh an dawng ang. Amaherawh chu he tanpuina hi Central Sawrkar, State Sawrkar leh a dawngtu ten an in tum sem thung ang.

He Project atan hian Mizoram Sawrkar chuan First Installment 4.67 Crore dawng tawh in he sum hmang hian Preliminary Survey leh Pocket Identification District tinah an nei mek a ni.

Vawiin a inhrilh hriatna hun ah hian Pu R. Lalsangluaia, Addl. DC Lawngtlai chuan thuhma sawiin a zir tura kalkhawm khawtlang hruaitute leh tlawmngaipawl te chu taima taka zir tur leh dik taka kalpui a nih theih nana theih tawp chhuah turin a chah a, a dawngtu tur thlan thuah pawh mahni duhsak zawng te aia a mamawhtu dik tak ngai pawimawh ngam turin a ngen a ni.

He hunah hian Pu Eddie Zonunkima leh Pu Michael Lalneihtluanga, Social Development Specialist te leh Pi Lalruatfeli, MIS Specialist ten RAY chungchang an zirtir a, chawhnu lamah Veng tin a dawng thei awm te enfiahna an hmang zui bawk. Naktukah Veng tin tlawhchhuahna neih chhunzawm leh a ni ang.