Vawiin khan Lawngtlai North East India Committee on Relief and Development, Lawngtlai District buatsaihin NEICORD Office ah Lawngtlai khawchhunga tlawmngai pawl, chanchinbu mi, kohhran hrang hrang leh mi thahnem ngai ten District Forum chung chang zir hona leh a din dan tur sawi hona an nei.

North East India Committee on Relief and Development hi Kristian tlawmngai pawl pakhat niin Gauhati ah hmunpui nei an ni a, an ni hian North East State 5 atangin District 7 an thlangchhuak a, chung zingah chuan Lawngtlai District hi Mizoram State atanga an thlanchhuah awmchhun a ni. Chung District an thlanchhuah ah te chuan Office hawngin mipuite mamawh inhrilh hriatna leh zirtirna chi hrang hrang bakah an chanvo dik tak an chang ngei em tih te an zir sak a, a tul ang zelin thu neitute hnenah an thlen sak leh thin a ni.

Vawiin zirho naah pawh hian District Forum tangkaina leh pawimawhna chi hrang hrang te sawiho a nih bakah NEICORD Project Manager Pu G. Daimei leh Co-Ordinator Nongyai te paper zir ho a ni a, kalkhawm ten an ngaihpawh sawichhuahna hun an hmang bawk.

He zir hona hi Pi Irene V. Zathang, Lawngtlai District Co-Ordinator in a kaihruai a ni.