Thingtlang khaw hrang hranga Solar Street Light (Ni zung hmanga kawtthler tih enna tur) engmawzat dahna tur bul tanna programme ‘Inauguration of Solar Street Light’ tih chu vawiin khan DLAO, Aizawl Conference Hall-ah neih a ni a, he ruahmanna hi LAD Minister Pu P.C. Lalthanliana chuan Solar Light hmet eng in a hawng a, he programme ah hian Parliamentary Secretary Pu K. Lalrinthanga pawhin a hmanpui a ni.
Pu P.C. Lalthanliana chuan ni zung chakna hmanga thingtlanga street light bunna programme LAD Department leh Zoram Energy Development Agency (ZEDA) tangkawp ten a bul an tanna hi khawvel changkang milh zela ram an kalpui tumna tha tak a ni, a ti. He ruahmanna pawimawh tak hian eng chhit senso leh a enkawlna lamah VC te a ti zangkhai thei dawn a nia a hriat thu a sawi. He hunah khaw hrang hranga VC member kalkhawmte chu heng street light te hi vantlangin an chhawr tangkai theihna tur ber hmunah te dah a, duat taka mahni ta anga enkawl a, a neitu chan changa a mawh la turin a chah bawk a ni.
LAD Minister chuan LAD Department-in VC enkawlna kawngah theihtawp an chhuah thusawiin VC te chanvo chu a bo a bang awm loin engkim VC te kutah a kal vek a, an chanvo chu an hmu zel a ni, a ti. Sawrkar in engkim mai min ti sak dawn tih ngaihdan leh rilru put hi thlak a hun tawh takzet a ni tiin Pu P.C. Lalthanliana chuan Sawrkar hi ka ta a ni ti hriaa, Sawrkar ka puihin keimah ka in pui a ni tih rilru put a ngai tawh a, hei hi ram kal zelna turah a pawimawh a ni, a ti. Sawrkarin thil zawng zawng a ti thei lo a, chuvangin mahni theih chin chinah VC te hian hma la in hemi kawng ah hian mawhphurna lian tak an nei a ni tih te hi hriat a pawimawh a ni, a ti bawk.
Programme hi Pu Thatkunga Secretary, LAD in kaihruai a, Pu A. Biaklawma Director, LAD chuan he ruahmanna chungchang chanchin tawite a sawi a, Pu Lalrinmawia Director, ZEDA hnen atangin technical report ngaihthlak a ni bawk a, Pu K. Lalmuana Additional Secretary, LAD chuan lawmthu sawiin programme a khar a ni. LAD Department officer leh staff thahnem tak leh leh Village Council member engemaw zat an tel bawk a ni.
Sawrkar ruahmanna ang chuan Village Council ten 13th Finance Commission atanga an sum hmuh atangin Street Light man hi an lo pe ve dawn a. Solar Street Light point khat atana senso tur hi Mizoram Sawrkar leh Zoram Energy Development Agency (ZEDA) te ruahman nain subsidy rate in Rs 4,500/- tura ruahman a ni a. A thawh khat nan Light Point 960 sem phawt a ni ang a. A lo thleng hmasa set 56 chu Aizawl District chhung a VC thlanchhuah te hnenah pek a ni ang a. District dang ah pawh a tahtawlin dah belh zel tura ruahman a ni.
Heng Solar Light te hian thingtlang lama Street Light a harsatna an neih te engemaw chen a chhawk zangkhai tura ngaih a ni a. Solar Street light te hi dah anih hnuah Contractor ten kum 5 an vil zui dawn a ni.
Solar Street Light bakah hian Street Light pangngai chhia siam that na atan kum 2014-15 chhunga 13th Finance Commission sum lo kal tur atanga pek turin VC te hnenah sum ruahman sak mek a ni bawk.
