Vawiin chhun dar 10:00 ah khan India Republic Day champha vawi 62-na chu CYLA Playground, Lawngtlaiah ropui takin lawm a ni a. Lawngtlai DC Pu B. Lalhmingthanga chuan Khuallian niin Hnam Puanzar a pawt pharh a, Parade Contingent te chibai bukna a chhang let a ni.

Khuallian Pu B. Lalhmingthanga chuan Republic Day puala chibai bukna thu sawiin Jan 26, 1950 kha India ram chanchina theihnghilh theih tawh loh hun pawimawh a ni a ti a. Zalenna kan neihna atana an nunna, tha leh zung lo sengtute zara kum 60 vel chhunga India hmasawnna hi a chhuanawm em em a ni a ti a. Lawngtlai District mipuite chu hmasawnna atan thinlung taka Sorkar tawiawma thawhpui tur leh, inunauna leh inpumkhatna vawng nung zel turin a sawm bawk.

Khuallian chuan Remna leh Muanna hnuaiah mipuiin Sorkar an thlawp that avangin kum 14 chhungin Lawngtlai District hian hmasawnna nasa takin a hmu a ti a. Mizoram Sorkar Flagship Programme NLUP hnuaiah beneficiary 5841 awmin Second Phase ah chhungkaw 4450 telh belh tura hma lak mek peih fel a nih hunah chuan a vaiin NLUP beneficiary 10291 an awm dawn a ti a. Multi Modal Transport Road laih hna chak taka thawh a nih bakah 460 MW pe chhuak thei tur Kolodyne Hydel Power Project pawh tan thuai thei turin chak taka hma lak mek a ni tiin a sawi a.

Kum 2011-2012 chhungin NRHM hnuaiah Sub-Center thar 2 hawn niin Lawngtlai District Jail chu 18 March, 2011 khan hawn a ni bawk a. Ran Kah-raina (Artificial insemination) hmun hawn thar niin he thiamna hmang hian bawng note 15 lai piantir a ni tawh. RMSA hnuaiah sikul 13 sak that niin sikul thar 2 sak a ni a. RGGVY hnuaiah khaw 27 ah eng pek a ni tawh a, Lawngtlai leh Saiha inkara 33KV D/C Tranmission Line chu siam mek a ni bawk. PMGSY hnuaiah kawngthar 5 laih mek a ni a. Lawngtlai khaw chhungah traffic point thar 2 siam niin a vawikhatna atan Zero Tolerance Week hman a ni a, Lawngtlai khaw chhunga traffic mumal zawka kalpui a nih theihna turin hma lak mek a ni a ti.

Lawngtlai-a India Republic Day lawmnaah hian SSA Pipe Band, Lawngtlai ten Band display hmuhnawm tak an entir bakah Lawngtlai-a Sorkar department 11leh Lai Autonomous District Council-a Art & Culture department ten Tableau Show hmuhnawm tak an entir a. Parade Contingent 13 zingah Downtown English School (Girls) chu 1-na an ni a. 2-na chu Govt. Region HSS niin 3-na chu ML Junior School (Girls) an ni. Tableau Show-ah Health department 1-na an ni a. 2-na chu Art & Culture department, LADC niin 3-na chu P&E leh DRDA te an ni. Republic day puala Volleyball Tournament neihah Police department an champion bawk a ni.

Kumina Republic Day lawmnaah hian Lawngtlai district chhunga mi chawimawi tlaka ngaihte chawimawina hun hmangin Pu Samson Thanruma, MAL Book of the Year 2011 (Beiseina Mittui) ziaktu leh Nl. Lalenkawli, AIBA World Junior and Youth Women’s Boxing Championships 2011-a World Champion te chu Certificate leh pawisa hlan an ni.

Republic Day lawmin Sorkar pisa tinah Hnam Puanzar zar a ni a. CYLA Playground-a Republic Day lawmna hun hman a nih hnuah hian Hospital leh Home paruk (6) - Civil Hospital, Lairam Medical Center, Christian Hospital, Lairam Motherless Home, Gilead Drop-in Center leh District Jail te Republic Day pualin Rs. 2,000/- theuh hlan a ni a. Lawngtlai Circuit House-ah ‘Át Home’ hman a ni bawk.