Vawiin chawhma dar 10 : 00 khan India ramin mahni a ro inrel hrang ram anihna champha Republic Day chu District Playground Saiha-ah ropui leh urhsun taka lawm a ni.

He Ni lawmna ah hian District Bawrhsap Pu Kunal IAS chu khuallian ni in zing dar 10:00 ah hnampuanzar pawtparh in parade chibai a chhanglet a, Republic Day thuchah sawiin khuallian chuan Republic Day lawmtura pungkhawm mipui zawng zawng te chibai bukin Saiha District chhunga sawrkar department hrang hrang te hmalakna chipchiar takin a tarlan bakah an hmachhawp mek te pawh a tarlang tel bawk. A bikin Mizoram sawrkar Flagship Programme N.L.U.P. chu Saiha District chhungah chhungkaw 2269 hnenah a thawh khatna atan pek anih tawh thu sawiin he scheme hi a hlawh tlinna chu a dawngtu te kutah a innghat ani ati. Kan hma lawk MDC General Election kan hma chhawn tur ah mipuite chu dik, thianghlim leh felfai taka inthlanna hmachhawn turin a ngena, sawrkar hnathawkte pawh mahni hna theuhah rinawm leh dik taka thawk turin a chah bawk a ni.

Republic Day lawmna ah hian Hnamhla ECM Higher Secondary School ten an sak bak ah “National Song” Maraland Hindi School ten an sa bawk. Parade Contingents 9 an awm a, School Contingents 5 leh Armed Contingents 4 an ni. School Contingents ah pakhatna Govt High School Saiha, pahnihna Govt Higher Secondary School Saiha, Pathumna ECM Higher Secondary School Saiha te an ni. Armed Contingents ah lawmman pakhatna M.A.P., pahnihna M.R.P. leh pathumna M.R.H.G. te an ni. Parade Contingents zawng zawngte hnenah hian Consolation Prize pek vek an ni bawk. He Ni lawmna pual vek hian Saiha khawpui chhunga sawrkar department hrang hrang 12 ten an department hnathawh dan leh hmalakna te pholang thei turin Tableu hmuhnawm tak an entir a, he Tableu entirna ah hian lawmman pakhatna chu National Rural Health Mission, Health & Family Welfare Department Saiha ten an dawng a, pahnihna Horticulture Department Saiha ten la in pathumna chu P.H.E. Department Saiha ten an dawng ani. Heng lawmman hrang hrang te hi Khuallian Pu Kunala IAS, District Bawrhsap, Pu S.Khipo CEM,MADC leh Pu PP Thawla MLA ten an sem ani. Chawhnu dar khatah sawmbikte pualin thingpui in hona “At Home” chu DC Bungalow ah neih a ni bawk.