Vawiin khan Jan 30 atanga tan 23rd Road Safety Week 2012 kharna chu CYLA Hall Lawngtlai-III ah neih a ni.
He Road Safety Week kharna inkhawm hi Pu T.Vanlalmalsawmsanga MCS.District Transport Officer chuan a kaihruai a, he huna khuallian Lawngtlai District Bawrhsap Pu B.Lalhmingthanga chuan thu sawiin State sorkar-in Road Safety Week hmang tur District Pali a thlan zinga Lawngtlai District kan tel ve chu Sorkar chungah lawmthu sawiin, he huna kalkhawm Driver-te hnenah Lirthei khalhtu te hian chintawk kan neih thiam a pawimawh hle a, thil kan tih a a lutuk hian Dan bawhchhiatna leh Accident a thlen thin a ni tiin rilru hmanhmawh lutuk te, tlan chak lutukte, fimkhur loh lutuk te, kan mawhphurhna ngaihthah lutuk te, ngaihsam lutuk te, inthlahdah lutukte leh lutuk tam tak hian Dan bawhchhiatna leh accident-na a thlen thin avangin a pawi em em a ni. Motor chetsualna leh tul lo taka buaina chhuak tam ber hi ruihtheih thila Driverte insum theihloh vang a ni deuh tlangpui a, a pawi em em a ni, tiin Driver-te chu Ruihtheih thila in thiar fihlim hram hram turin a chah bawk.
He hunah hian Thusawitu dang Pu Thangchem Zathang. Project Director. DRDA chuan Driver-te tan nungchang mawi tih chu thiam takin a sawi a, Pu Ricky Lalduhawma,Traffic O/C pawhin Traffic Rules chungchangah kalkhawmte zirtirna a pe bawk a. Pu Jerome Lalbiakdika, M.VI. Lawngtlai chuan Motor Registration leh Driving chungchangah hriattur pawimawh tak takte a tarlang bawk. Road Safety Week kharna hunah hian Lawngtlai-a Taxi leh Auto Rickshaw khalhtute an kal tha hle a ni.
