Ni 1.2.2012 zana Saiha Bazar-a kangmei rapthlak tak chhuak chu a hmun ngeia en turin Minister pahnih Pu S. Hiato,  PHE etc. Minister leh Pu Zodintluanga, UD & PA etc. Minister ten vawiin chhun dar 12 khan Saiha an thleng.

Minister te hi chhiat tawhna hmun bulah chhiat tawk chhungkua, official te, V/C leh tlawmngai pawl hrang hrangten an lo hmuak a, anmahni hmuahna ah thu sawiin Pu S. Hiato chuan Saiha khawpuiin kangmei vanga chhiatna rapthlak tak a tawk chu pawi a tih thu leh a thinlung tak takin kangmei tuarte a tawrhpui thu a sawi a, chhawmdawlna hna chak taka kalpui anih theih nan sorkar chuan theih tawp a chhuah dawn a ni, a ti bawk.

Pu Zodintluanga pawhin thu sawiin kangmei tuarte a tawrhpui thu a sawi a, hetih lai hian mi thenkhat ten hetiang chhiatna hi politics a hamthat tum nan hman kan tum thin a, a pawi hle a ni, a ti bawk. He hunah hian chhiat tawkte tanpui nan Mizoram Governor Pu Vakkom Purushothaman chuan Rs. 78000/-; Pu Zodintluanga, Minister chuan UD & PA Department atangin In sak that nan 1st Instalment-ah chhungkaw khat tan Rs. 40000/- theuh leh anmahni chhungkaw tinte Rs. 1000 theuh a pe bawk. Saiha DC Office atang pawhin kangmei tuarte tanpui nan chhungkaw tinte Rs. 10000/- theuh leh blanket 100 leh silpauline 100 an pe bawk. He chhiat tawhna ah hian kangmei tuar zawng zawngte hi chhungkaw 66 an ni a, New Colony V/C huamchhungah chhungkaw 48 leh Vengpui V/C huamchhungah chhungkaw 18 te an ni, he kangmei ah hi mimal In 29 leh MADC quarters 3 te chu a kang fai vek a ni.

Kangmei tuarte chhawmdawlna leh an In sak hna chak taka kalpui anih theih nan Member 11 awmna Task Force Committee Pu N. Chakhai, Additional DC kaihhruaina hnuaia din te nen Minister te hovin an thukhawm nghal dawn a ni. He kangmei chhuah laia theih tawpa thelh tuma beitu tam tak zingah heng PHE Deptt.; Fire Deptt. leh MTP General Hqrs. te leh mimal mi 15 hnenah chawimawina Certificate Minister te hian an hlan nghal a ni.