Chief Minister Pu Lal Thanhawla chuan vawiin khan Kangmei Venna Hapta, Fire Prevention Week, 2012 chu I&PR Auditorium ah a hawng.

Chief Minister chuan ram a kan chhan ber chu kan fimkhur tawk loh vang a ni a ti a. Mei kawng kan sial that loh vangte, meizial bung tithi lova kan paih mai thin avangte leh roadside reserve thleng thlengte kan vah thin avangin kangmei a chhuak thin a ni a ti a. In kang tam ber chu dik tak leh anih tur anga electric kan hman thin loh vang a ni a ti. Duham vang leh rinawm tawk loh avangin department phal chin aia tam electric kan hmang a, transmission line atangte in kan pawt ru a, hei hian load a zo lova kangmei a chhuak ta thin a ni a ti a. A zahthlakin a pawi hle thin a ni a ti. Chief Minister chuan keini tlangram loneimite hian ram kang hi kan chik hle a tul a ni tiin, tunah chuan kangmei chhuak thei ven a pawimawhzia kan hre chho tan ve ta a, tlangram lo neih pawh 36% a tlahniam tawh a ni tiin, hei hian ramngaw chereu tur pawh a tlem phah dawn a, a lawmawm hle a ni a ti.

Chief Minister chuan kangmei hi chhiahhlawh tha tak, mahse pu hlauhawm tak a nih avangin, kangmei laka fimkhur tulna hi sawi tam lutuk a awm theilo a, sorkar leh khawtlang hotute bakah mi challangte hian uar taka kan sawi kan sawi hi a pawimawh hle a ni a ti a. School zirlaiah  tam zawk telh a, ramhmul leh nungcha te humhalh tulna te, kan luituite a kangchah loh nana ramngawte humhalh a pawimawhzia hre thar tura tlangaupui hi kan tih tur tul tak a ni a ti. Chuvangin kangmei a chhuah loh nan fimkhur tinrenga kan fimkhur a ngai a ni tiin, neitu rilru pu chunga tan la thar turin mi zawng zawng a sawm a ni.

Chief Minister chuan tunhnaia Saiha a kangmei rapthlap tak chhuak chu pawi a tih thu sawiin, chhiat tawk zawng zawngte chu a tuarpui hle a ni a ti a. Sorkar in(building) tam zawkah kangmei venna tha tak dah tura hmalak mek a nih thu a sawi bawk a ni.

State Level Committee on Fire Prevention(SLCFP) Vice Chairman Pu H.Rohluna, E&F Minister pawhin thusawiin, Mizorama ram kang awm chhan ber pakhat chu fimkhur tawk loh vanga lo kan hal thin vang a ni a ti a. Sorkar flagship programme NLUP hian ramngaw tha siam hi a tum ber pakhat anih avangin a hlawhtlinna ngei theih nan tan kan lak a tul hle a ni a ti.

Hawnna inkhawma report petu Dr. S.S.Garbyal, PCCF & Member Secretary, SLCFP chuan ram kang hian nungchate leh thing leh mau, kan boruak thleng a tihchhiat avangin nasa takin ramngaw a nghawng chhia a. Hei bakah boruak hip tur thalo, bio-mass a siam thin avangin mihring hriselna a khawih chhe thei a ni a ti a. Mizorama kangmei chhuak thin hi khawilai bik hmunah emawte anih thin avangin a venna lamah khawtlang tanrualna a pawimawh hle a ni a ti.

Hawnna inkhawmah hian mi pawimawh thahnem tak telin, Pachhung University College zirlaite an tel bawk a ni.