Vawiin hian Lawngtlai District-ah RTI Week 2013 chu hlawhtling taka hman a ni a. Lawngtlai District Additional DC Pu R. Lalsangluaia, MCS chu khuallian niin Department hrang hrang leh District Council atanga SPIO leh SAPIO te bakah Lawngtlai khawpui leh a chheh vela Village Council-te leh NGOs te kalkhawmin RTI chungchang an zir ho.

Khuallian Pu R. Lalsangluaia chuan ramin hma a sawnna kal kawngah Right to Information hian a thawh hlawk hle a, India ram chu mipui sawrkar mipuite siam a nih ang ngeiin mipuiten an chanvo awlsam taka an hriat theih tak vang a ni a ti a. Sawrkar hnathawk leh Department tinte pawhin mipuiten kan hnathawhna kawngah hriat duh an neia danin min phalsak thil a nih bawk chuan hun tiam chhung ngeiin hrilh hriat kan tum tur a ni a ti bawk.

Inkhawm kaihruaitu Pu C. Lalsangluaia, MCS, SDO Sadar, Lawngtlai District in Key- Note Address sawiin RTI zarah Department hrang hrangte leh mipuite inlaichinna a tha sawta a hriat thu sawiin hmun thenkhatah intihhmingchhiatna lam hawi lek lek thil awm palh thin mahse ram mipuite leh sawrkar in hmasawnna hna kan thawk ho a ni a ti a. SPIO te leh SAPIO te pawhin RTI hi kan hre chiangin dan ang taka kalpui ngei kan tum thin tur a ni a RTI hmanga min rawn zawh hun lo nghah kher pawh hi a dik ber lo a ni a ti bawk.

He inkhawmah hian Pu Vanlaltanpuia, MCS, SDC Lawngtlai chu Resource Person niin kalkhawmte RTI chungchang a zirtira, a ni hian RTI tobul atanga tuna kan hman lai mek chungchang sawiin Sawrkar lam chanvo leh Mipui lam chanvo chi hrang hrangte a sawifiah bakah a lehkha buatsaih a sem a. Resource Person in thu a sawi zawh hian kalkhawmte hian RTI chungchanga harsatna an tawhte, an hriat chian tawklohte leh thil dang dangte an zawt hlawma. Heng zawhnate hi a chhangin a hrilhfiah bawk a ni.