Vawiin khan Education Department, Mizoram leh Sir Ratan Tata Trust & Navajbaj Ratan Tata Trust chuan Aijal Club-ah Mizorama zirna tih hmasawn zual nan thawh hona thuthlung, Memorandum of Understanding an ziak.

MoU hi Mizoram sorkar aiawhin Pu K.Lal Nghinglova, Commissioner & Secretary, Education & HRD Department leh Ratan Tata Trust aiawhin H.D.Malesra, Trustee, NRTT ten an ziak a ni.

Pu K.Lal Nghinglova, Commissioner & Secretary, Education & HRD Department chuan zirna tih hmasawn zelnana thawhpui tha tak Mizoramin a nei thei tur chu lawmawm a tih thu sawiin, zirna chhenfakawm tak a rah chhuah ngei a beisei thu a sawi. Ratan Tata Trust aiawh a MoU ziaktu H.D.Malesra chuan lehkhathiam tamna state, Mizoram nena zirna tih hmasawn kawnga thawh hona an nei thei tur chu lawmawm a tih thu sawiin, Ratan Tata Trust hmalakna hrang hrangte a sawilang bawk.

He MoU hian Primary leh Middle school a huam a, sorkar school zirtirtu training, school hmunhma tha siam nan leh zirna tih hmasawn nana senso tur zawng zawng te Ratan Tata Trust hian a tum thei dawn a ni. Sum hi SSA kaltlanga pek a ni ang.