Vawiin khan Lawngtlai-ah World TB Day 2015 hman a ni a, thlalai engemawzat ten TB laka inven a tulzia leh inenkawl that a tul zia puanchhuahna kawngzawh an neih bakah khawpui laili Aeropagy ah inkhawm buatsaih a ni.

World TB Day 2015 hi Lawngtlai Chief Medical Officer huaihawta neih a ni a, zing dar 6:00-ah Bazar veng YLA thlalai rual ten TB laka inven a pawimawhna kawr (T-Shirt) ha chung leh Thuziak (banner) kengin Chawngte Peng atangin Aeropagy thleng kawng an zawh a, Areopagy ah hian inkhawm tawi buatsaih nghal a ni.

He inkhawm tawiah hian khuallian Pu V. Zirsanga, CEM LADC chuan thu a sawi a, mipuite hian kan hriselna nasa zawka kan ngaihven a, thianghlimna lamah tan kan lak zel a pawimawh hle a ni a ti. Mi invawngfel leh thianghlim taka nung thinten an tawh lo natna tam tak hi mi thatchhe zawkten an tawng fova, chhiatna nasa zawk an tawh phah fo a ni. Hei vang hian TB Day ah hian kan zain ngaihtuahna thar puin kan taksate I enkawl ang u tiin kalkhawmte a fuih a ni.

Inkhawm kaihruaitu Dr. C. Thangkima, Chief Medical Officer, Lawngtlai chuan TB natna chungchanga Mizoram leh Khawvel dinhmun a tarlang a, Mizoram leh Lawngtlai District a hmalak dan tlangpui pawh a tarlang bawk. Dr. C Thangkima hian tuna TB natna vei, enkawl mekte chu dik taka an damdawite ei ngei turin a ngen nghal bawk a ni.

Tukin inkhawah hian Lawngtlai District chhunga TB damdawi semchhuahna lama ti tha, sawrkar leh mahni inpea thawktu mi engemawzat te hnenah lawmman sem nghal a ni.