Vawiin khan Patent Information Centre, Directorate of Science & Technology buatsaihin Regional Institute of Paramedical & Nursing Sciences (RIPANS) zirlaite pualin “Innovation & Intellectual Property Rights Awareness Workshop” Aijal Club-ah neih a ni a. Dr. C. Vanlalramsanga, Secretary, Planning & Programme Implementation Department chu khuallian a ni.

Workshop hawnna inkhawm hi Dr R.K.Lallianthanga, Chief Scientific Officer-in a kaihruai a. Workshop chhimtute lawmna thu sawiin, Directorate of Science & Technology chuan Mizoram sorkara hotute kaihhruainain Mizoram hmasawn nan kawng hrang hranga hma an lak zel thu a sawi a. Hmalakna hrang hrang zingah pawimawh tak pakhat chu Patent Information Centre hi a ni, a ti a.

He workshop-a khuallian Dr. C. Vanlalramsanga, Secretary, Planning & Programme Implementation Department chuan, tunlai khawvelah ram hmasawnna tak tak atan Science leh Technology lama hmasawn a pawimawh thu a sawi a; thil thar hmuhchhuah leh siam chhuah lam (Innovation) te, a hmu chhuaktu leh a siam chhuaktuten neitu nihna chanvo (Intellectual Property Rights) an neih theihna tura hma lak te hi sorkar pawhin a ngaihpawimawh telh telh thu sawiin, he lam kawnga Directorate of Science & Technology hma lakna avangin lawm thu a sawi a. Thil thar hmuh chhuah leh siam chhuah kawngah leh kan thil hmuh chhuah leh siamchhuah te a neitu nihna midangin min chuhpui lohna tura vawnhim kawngah dan mumal tak zuia hma kan lak a tul thu a sawi a. Workshop-a kalte bakah Mizo mipui mimirte heti lam kawnga kan thanharh a tul thu a sawi bawk.

Technical session Dr H.Lalhlenmawia, Head of Department, Department of Pharmacy, RIPANS -in a kaihruai a, Pu Samuel Lalmalsawma, Scientific Officer, Patent Information Centre, Directorate of Science & Technology leh Dr Laldinliana, Asst Professor, Department of Commerce, Mizoram University ten Intellectual Property Rights leh Creativity & Innovation chungchang ngaihnawm takin zirtirna an pe a. RIPANS zirlai engemawzat he workshop ah hian an tel.