LAWNGTLAI ARTIFICIAL GRASS PROJECT HMUH THUAI BEISEI A NI : ZODINTLUANGA

Aizawl, the 11^th January 2015: Pu Zodintluanga, Minister, Sports & Youth Services chu Union Minister for Youth Affairs & Sports Pu Sarbananda Sonowal sawmna angin 19^th National Youth Festival, Guwahati-a neihah India ram state hrang hrang atanga kalkhawm thalaite hmaah nimin khan thu a sawi.

National Youth Festival-a thu a sawi zawh hian Pu Zodintluanga chu Pu Sarbananda Sonowal hian a thlenna Circuit House-ah lengah sawmin Pu Zodintluanga chuan sports lama Mizoram mamawh a thlen zingah Lawngtlai CYLA Ground-a astro turf phahna tur project Ministry hmasaa Mizoram sorkarin a lo thehluh tawh chu document kimchang Ministry lama thehlut leh a, a hma thei ang bera tihfel a nih tur thu Union Minister Pu Sonowal hian Pu Zodintluanga a hrilh. Pu Sonowal-a chuan a sawmna ngaipawimawha Pu Zodintluanga Guwahati-a a lo kal chu lawmawm a tih thu a sawi.

Youth Festival-a thu a sawinaah Pu Zodintluanga chuan India rama thalaite hi inpumkhatna leh inunauna thlentu an ni thei a, India ram hi ram nuamah an siam thei a ni a ti. Pu Zodintluanga chuan a thusawiah chuan India ram mipui 1.21 billion zinga 65% aia tam mah hi kum 35 hnuai lam an ni a, Europe, Khawthlang leh khawchhak ram tam takah thalai an tlem avangin ‘ageing problem’ an nei nasa hle a. Chutih lain India ram chu thalai an tam avangin ‘work force’ pawh hi an thalai seng sawng a, thalaite chakna youth power hian thil tam tak a ti thei a, India ram hi ram nuamah a siam thei a, chu thalaite chakna chu hman tangkai a nih chuan India hian nasa takin hma a sawn dawn a ni, a ti.

Minister Zodintluanga chuan thalai kal khawmte chu hnam hrang hrang nunphung leh tihphung inzirtawn a, hriatthiamna nei turin a chah a. Hnam hrang hrang tih dante kan inhriattawn chuan inhriamthiam lohna awm theite kan pumpelh thei a, harsatna awm thei lakah pawh kan fihlim theih thu a sawi a ni. Minister chuan a sawi zelnaah, thalaite chu rilru zau leh hmasawn tak an put a tul thu a sawi a, inunauna a lo zual zelna turin youth festival te pawh tam zawk buatsaih a intawhkhawm fo hi a tul a ni, a ti.

19^th National Youth Festival-ah hian college professor, social worker, MP leh mi hmingthaten thu an sawi a. Youth Festival-ah hian India ram state hrang hrang atangin thalai sang thum vel an kal khawm a, programme hrang hrang neih a nih bakah food festival, cultural programme leh adventure programme te buatsaih a ni.

Pu Zodintluanga hi Union Minister for Youth Affairs & Sports Pu Sarbananda Sonowal-a’n rawn bia-in youth festival-ah hian thu sawi turin a sawm a, tawngkaa a rawn sawm hnuah hian official letter-in a rawn umzui a, Pu Zodintluanga hi he festival-ah hian a tel ve ta a ni. Mizoram atangin National Service Scheme (NSS) member 10, NSS Programme Officer 2 leh Sports & Youth Service official-ten Sports Minister hi an tawiawm a ni. 19^th National Youth Festival khi ni nga chhung awh tur, 8^th January, 2015-ah tanin 12^th January, 2015-ah a tiak ang.