Vawiin khan Directorate Sports & Youth Service buatsaihin National School Games 2015 a Girls Hockey Champion Team te lawmna leh thingpui inpuina, Directorate of Sports & Youth Services Conference Hall-ah neih a ni. He lawmna inkhawm hi Pu Zothankuma IAS, Secretary, Sports & Youth Services chuan a hmanpui.

60th National School Games hi 3 - 7 January, 2015 chhungin Ranchi ah neih a ni a. Mizoram Girls Hockey te hi Girl Hockey Academy, Thenzawl a zirlaite an ni a. Mizoram Team te hi Champion Trophy No mawi chawi thei tur hian hengte hi an hneh a ni. Vidhya Bharti 13-0, Kerela 5-0, Uttar Pradesh 9-0 (Quarter Final), Orissa 2-0 (Semi final), Jharkhand 3-2 (Final). Mizoram Team te hi Hockey Coach pahnih Nl. Lalrothuami (Bitei) leh Jagan Topno ten an hruai a ni.

Lawmna hun inkhawm hi Pu J. Vansangzuala, Joint Director in a kaihruai a. Pu Lalzirmawia Chhangte, Director, Sports & Youth Services in lawmna thu a sawi a. Nl. Lalrothuami, Hockey Coach in report a pe bawk. Khuallian Pu Zothankhuma, IAS, Secretary SYS chuan thusawiin Hockey ah te Football-ah player tha tak kan nei ta hi a lawmawm a. A inkhelh kan thiam em em laiin tawng lam kan thiam tawk loh avangin kan nih tur ang kan ni pha thin lo a ni. Kan hotute pawh inkhelh bakah tawng zirtirna hma tel thei se tha a tih thu a sawi. Mizoram Girls Team te hi nikum National School Games ah pawh an lo champion tawh a ni. Pu R. Buanthanga, Deputy Director in lawmthu sawiin hun a hmang bawk.