Mizoram Governor thar Dr. Aziz Qureshi chu Mizoram ah ni thum chiah a awm hnu in nimin ni 11.1.2015 (Pathianni) chawhnu khan Mission Veng Kohhran Biak Inpui ah a inkhawm.
Dr. Aziz Qureshi hian 8.1.2015 khan Mizoram leilung rawn rapin a tuk 9.1.2015 khan Governor atan lakluh a ni. Governor atana lakluh a nih zawh veleh Press mite a kawmnaah Dr. Aziz Qureshi chuan Mizoram chu ram mawi leh hring nuam tak a ni tiin ram mipuite hlimna leh lungngaihna tawm a, ram tih hmasawn nana mipuite nen lungrual taka thawk hova a hna a chelh dawn thu a sawi a. Mizoram-a awm chu hremna a a ngaih reng reng loh thu zawhna chhangin a lo sawi tawh a ni.
Governor hi Mission Veng Kohhran chuan an kohhran biak in a tlawh avanga lo lawmna thu sawiin Mission Veng Kohhran chanchin report tlangpui an hrilh nghal a, amah leh a chhungte tan leh Mizoram a tha tak a ro a rel theih nan an tawngtai sak fo ang tih an hrilh.
Inkhawm ban ah hian Governor hian Kohhran puipa te leh kohhran mite hnenah inlawmna chibai a buk kual a ni.
Mission Veng kohhran hi 15 February, 1898 ah din tan a ni a, tun a kohhran dinhmun chu member 4001 awm in hmeichhia 2148, mipa 1853 an ni a chhungkaw 878 an awm a ni. Minister 22 leh kohhran upa 17 an awm mek a ni.
