2082/2026-2027

Lawngtlai, 6th September 2026 : Nasha Mukt Bharat Abhiyaan - hnuaia hmalakna kal zelah vawiin khan Lawngtlai Area TKP Co- ordination Commitee (LATKPCC) bultuma Ruihhlo that lohzia inzirtirna puala 'Reels insiamsiak' result puanna leh lawmman semna BCM Bethani, College Veng Kohhran Hall- ah neih a ni a. Lawngtlai Bawrhsap Pu Donny Lalruatsanga chuan hmanpuiin lawmman semna a nei.

Pu Donny Lalruatsanga chuan kalkhawmte chibai bukin Ruihhlo that lohzia inzirtirna puala 'Reels' siam leh lawmman semna hun hman a ni chu thinlung taka lawmawm a tih thu a sawi a. Ruihhlo do kawnga LATKPCC - te hmalakna fakawm a tih thu sawiin, hma lam hunah pawh thahnemngai taka thawk chhuak turin  a fuih a.

Chhungkua, khawtlang,  ram leh hnamin a buaipui ber pakhat   ruihhlo  do turin thawhhona tha a tul em em, a bik takin thalaite zingah inzirtirna neih tam a pawimawh hle a ti a. June ni 11, 2026 khan Lawngtlai District- chu Mizorama Kangmei veng tha berah thlan a lo ni tawh a, heihian ruihhlo do kawngah pawh theihtawp chhuah a nih chuan Mizoramah a titha ber a ni thei tih a tichiang hle tiin, tanrualna leh thawhhona nen a beih erawh a pawimawh hle ang a ti. Bawrhsap chuan Faina leh thianghlimna, Traffic Management, Dan leh thupek kenkawh kawngah pawh theihtawp chhuah mek a ni tiin, LATKP Member- zawng zawngte phur taka sawrkar lo tawiawm tlat turin  a sawm a ni.

Bawhrsap chuan Ruihhlo do kawngah sawrkarlaipui hmalakna bakah State sawrkar pawhin theihtawp a chhuah mek a ti a. A bik takin District dangin  an neih ve loh Lawngtlai District- ah chuan Drug Free District - kalpui mek a ni tiin, heihian a tum ber chu Lawngtlai District- chu Ruihhlo awmlohna hmuna siam a ni a; hemi hnuaiah hian sawrkar leh khawtlang hruaituten theihtawp an chhuah mek tih a sawi a. Ruihhlo do kawngah mimal tin te an pawimawh hle a, mahni  theuhin ruihhlo tilo  tura intiamna neia, ruihhlo laka fihlim a tul tak zet a ti. Ruihhlo do kawngah District dangte entawn ni tura  Lawngtlai District - in theihna a neih hmuhthiam a tul a, chumi tur chuan mimal, chhungkua, NGOs leh Kohhran te tanho a pawimawh hmasa tiin,thawhhona tha vanga ruihhlo do a hlawhtlin ngei a beisei thu a sawi a ni. Ruihhlo that lohzia leh a nghawng midangte zirtir kawngah thalaite an pawimawh hle tih sawiin, midangte zirtir kawngah thahnemngai tak thawk turin a fuih a. Pu Donny Lalruatsanga chuan ruihhloin mimal, chhungkua, khawtlang leh Kohhran bakah  ram leh hnam a tihchhiat nasat zia chhût a, khua a tlai hmaa mimal, chhungkua, ram leh hnam chhanhim  tura theihtawp chhuaha ruihhlo do pui turin kalkhawmte leh Lawngtlai District - mipuite a sawm nghal bawk.

LATKPCC- hruaitute chuan 'Nasha Mukt Bharat Abhiyaan' kaltlanga DC Office nena thawhhona tha tak an nei thei chu lawmawm an tih thu an sawi a. Lawngtlai District- hmasawnna turah District Administration leh Kohhran thalaiten  thawhhona tha zawk an neih zel an beisei thu an tarlang bawk a ni.

Lawngtlai Area TKP Co- ordination Commitee (LATKPCC) bultuma Ruihhlo that lohzia inzirtirna puala 'Reels' insiamsiaka lawmman dawngtute chu a hnuaiah hian tarlan a ni.

Pakhat na: TKP Bazar Veng Unit

Pahnih na:TKP Chandmary Veng Unit

Pathum na:TKP Nazareth Unit, Council Veng

Consolation Prize

1. TKP Electric Veng Unit

2.TKP Zion Unit, Lawngtlai Vengpui

3. TKP Kanaan Unit, Lawngtlai AOC

Pu Donny Lalruatsanga chuan lawmman dawngtute hnenah lawmpuina pawisafai a hlan nghal a ni.

Lawngtlai Area TKP Co- ordination Commitee (LATKPCC) hnuaiah Pastor bial- 20, TKP Unit -92, leh Member- 9,127 an awm mek a ni.