3214/2022-2023

Pawlkut thla ni 11, 2023: 10th Chakma Autonomous District Council (CADC) Caretaker mawhphurhna latu, Lawngtlai Bawrhsap Pu Amol Srivastava chuan ni thum chama CADC hmunpui Chawngte (Kamalanagar) tlawhin, official-te nen inkawm hona hun a buatsaih bakah, hmun pawimawh leh hna hrang hrang a enfiah.

Lawngtlai Bawrhsap & CADC Caretaker Pu Amol Srivastava hian nimin piah, January ni 9, 2023 khan Chawngte thlengin, CADC-a Head of Department te chu meeting a neihpui a. Tlawmngai pawl hrang hrang - Young Chakma Association, Chakma Mahila Samiti, Mizoram Chakma Students’ Union leh pawl dangte nen inhmu bawkin, anni hian kumin April thlaa neih tura beisei CADC General Election chungchangah, Chakma-te'n kum tin April thlaa an hman ṭhin an hnam leh sakhaw kut, Bizu a tihbuai loh nan Bizu hmaa inthlan buatsaih a nih theih nan a hnenah hian ngenna an thlen a ni.

Lawngtlai Bawrhsap & CADC Caretaker hian nimin khan CADC New Secretariat building, Govt Kamalanagar College, Ekalavya Model Residential School leh hmun pawimawh dangte a tlawh a. Chawngte Sub-Divisional Officer (Civil) Dr Manesia Khaimeichho, CADC-a Education Officer (P/S) Pu Gana Chandra Chakma, CADC-a DTO & OSD to Caretaker Pu Sadananda Chakma leh official dangte'n an ṭawiawm a ni.

Lawngtlai Bawrhsap chuan EMRS District Level Committee Chairman a nih angin Ekalavya Model Residential School (EMRS), Dulubonya, Kamalanagar chu tlawhin, building thar sak hna kal mek a enfiah a. EMRS building thar sak mekah hian tui lakna leh Chawngte aṭanga panna kawng te chu siam hmabak a la ni. Govt Kamalanagar Higher Secondary School leh Govt Kamalanagar College te tlawh bawkin, a panna kawng thawm ṭhat dan tur a enfiah a. Kum 5 liam ta aṭanga NABARD sum cheng vaibelchhe 8 senga sak mek, Udalthana-a CADC New Secretariat building pawh tlawhin, a enfiah a. CADC PWD-a thawktute'n an hna thawh dinhmun an lo hrilhfiah a ni.

Hemi hnu hian Rural Drinking Water Supply Scheme hnuaia cheng vaibelchhe 9 senga hna thawh mek, Basantasora Duor hmuna Kamalanagar (Chawngte) Rural Drinking Water Supply Project chu a tlawh leh a. Kamalanagar Public School leh Govt Comprehensive Middle School, Kamalanagar te pawh tlawhin, zirlaite hnenah chithlum a sem bakah, inkawm hona hun a hmanpui bawk.

Lawngtlai Bawrhsap & CADC Caretaker Pu Amol Srivastava hian vawiinah Chawngte chhuahsanin, Lawngtlaiah a let leh ang.