3215/2022-2023

Aizawl 11th Janury 2023: Mizoram Rural Bank in anmahni dawrtute tana Internet kaltlanga account khawih chetna tur Internet Banking Transaction rights facility thar chu ni 9 January, 2023 khan V. Siva Kumar, General Manager (RRB), SBI Corporate Center, Mumbai chuan MRB auditorium ah a hawng.

Hawnna programme hi Pu Samuel L Warbah, General Manager, MRB chuan kaihruaiin Pu C. Ramdinsanga, General Manager, MRB chuan welcome address a sawi a, V. Jaya Chandra, Chairman in MRB dinhmun leh hmalakna te report a pe a, MRB chu Mizoram chhunga Bank awm te zingah branch ngah ber a nih mai bakah bank awm lohna khua thingtlang kilkhawr ber thleng pawhin Customer Service Point za chuang hmangin mipui rawng an bawl mek thu sawiin bank thang chak ber te zinga mi a nih thu a sawi a, anmahni dawrtute tan IT lamah pawh theihtawpa hma an lak thu a sawi bawk a ni.

Chief Guest V. Siva Kumar, General Manager (RRB), SBI Corporate Center chuan Internet Banking transaction rights facility a hawn zawhah thu sawi nghalin MRB hmasawnna ropui a tih thu leh internet banking transaction facility an nei ta chu a lawmpui thu a sawi a, hmasawn zel turin duhsakna a hlan bawk a ni.

He hunah hian Mizoram Rural Bank hian Mizoram sawrkar hnuaia Information & Communication Technology department hnenah free public wifi dinna turin wifi router 500 hlanna an nei nghal a, Mizoram sawrkar aiawhin Dr. Lalthlamuana, Chief Informatics Officer, Deptt. of ICT in thilpek hi dawngin thu a sawi nghal a, ICT department in BharatNet hnuaia a hmalakna pakhat thingtlang khaw 500 te tan a thlawna wifi pekna turin VSAT bun tawh a ni a, mipui hman tangkai tak tak theih tur chuan wifi router mamawh a nih thu leh hemi atana Mizoram Rural Bank in wifi router an lo thawh ve chu lawmawm a tih thu sawiin digital transaction lama MRB hmalakna ah an theih ang apianga lo puih ve an inhuam thu te a sawi a ni.

P. Shimrah, General Manager, Reserve Bank of India, Aizawl leh KVSSLV Prasada Rao, General Manager, NABARD Aizawl te pawhin lawmpuina leh duhsakna thu an sawi bawk a ni. Saibal Kanti Roy, General Manager, Vigilance in lawmthu a sawi bawk a ni.