No.3028/2021-2022


Sahmulphah thla ni 17, 2021: Nimin khan rawlthar kum 13 mi, Benjamin T. Lalhruaitluanga kutchhuak, instrumental video chu Lawngtlai Bawrhsap Dr Andrew H. Vanlaldika chuan LADC Conference Hall-ah a tlangzarh.

Dr Andrew H. Vanlaldika chuan Pathianin mihringa thiamna leh theihna a dah chu a hai chhuak peih apiangte'n malsawmna an dawng thin tih sawiin, Benjamin T. Lalhruaitluanga'n naupang tea kutchhuak ropui tak a nei chu chhuanawm a tih thu a sawi a. Fate enkawlna kawnga nu leh pa mawhphurhna sanzia sawiin, chhungkuaa bul tanna fuh leh nu leh pa te inpekna leh an thawh rah hmuh theiha rawn par chhuak chu lawmawm a tih thu a sawi.

He instrumental video tlangzarh inkhawm hi MJA Lawngtlai District General Secretary Pu Lalchharliana'n a kaihruai a. Rev. Vanlalchhuanga'n hunserh hmangin, Music Instructor Pu Bobbie Chanchinmawia'n thu a sawi a. Pu Obed-Cung chuan video thlir lawkna hun hmangin, Lawngtlai-III Bialtu MDC Pu T. Lalengmuana, Pu H. Lalhmingmawia, Pu CZ Thanliana leh Pu Emmanuel-a te'n thu an sawi bawk a. Benjamin T. Lalhruaitluanga'n rimawi tumin, chhungkaw lam atangin Pu T. Thaluaithanga'n lawm thu a sawi a ni.

Attachment

  • Loading attachment...