No.3027/2021-2022
Sahmulphah thla ni 17, 2021: November thla chhunga Special Summary Revision of Electoral Roll, 2022 kalpui mek puala District Election Office, Lawngtlai leh Lawngtlai District Football Association (LDFA) Futsal Committee te tang kawp huaihawt SSR 2022 Futsal Tournament chu nizan khan Rorelliana Chinzah Futsal Ground, Lawngtlai Vengpuiah khelh zawh niin, a kharna hun hman a ni.
SSR 2022 Futsal Tournament kharna hun buatsaihah hian Lawngtlai Bawrhsap, District Election Officer Dr Andrew H. Vanlaldika chu khuallian a ni a. Infiamna chu taksa hriselna atan a pawimawh mai piah lamah, ei zawnna kawng tha tak a ni tih sawiin, Lawngtlai District thalaite chu infiamna kawnga hmasawn zel tum turin a fuih a. Tournament lawmmante a sem bawk.
Tournament kharna hun hi LDFA Futsal Committee Chairman Pu A. Vanlaltholeha'n a kaihruai a. Match Commissioner Pu Joseph K. Lalawmpuia'n report pein, Secretary Pu C. Lalhmachhuana'n lawm thu a sawi a. DRDA team leh Futsal Committee te'n friendly match an khelh hnuah final hmuhnawm tak khelh zui a ni.
He SSR 2022 Futsal Tournament hi kum 16 chin chung lam a duh apiang tel theiha buatsaih a ni a. India khua leh tui kum 18 tling chinte electoral roll-a an inziah luh ngei theih nana hma lakna chi khat a nih angin tel tur zawng zawngin an kum zat tihchianna an theh lut vek a. Kum 18 tling chin, Voter ID Card nei lo tan chuan tel theih loh tih niin, Form 6 hmanga anmahni bialtu Booth Level Officer (BLO) hnena electoral roll-a luh dilna an theh lut ngei tih finfiahna nei erawh tel phalsak an ni thung.
He tournament-ah hian team 31 telin, ni 6 chhung khelh a ni a. A pumpuia match 30 khelhah goal 234 lutin, yellow card tum 74 leh red card tum 6 phawrh a ni.
Final hi Elpaso leh Youngstar-3 te'n khelin, hun pangngaia 2-2-a an inhneh tawk avangin penalty hmangin a chak zawk zawn a ni a. Elpaso hian 3-2-a hnehna changin, SSR 2022 Futsal Tournament champion an ni ta a ni.
He tournament-ah hian Young star-3 jersey no. 11 Richard Rohmingliana chu best player & top scorer a ni a. Elpaso jersey no. 1 Ivan Lalnunpuia chu best goalkeeper atan thlan a ni.
Attachment
- Loading attachment...
