No.3026/2021-2022

Aizawl, the 17th November, 2021: Vawiin khan Mizoram State Boundary Committee chu an Chairman Pu Tawnluia, Dy. Chief Minister hovin Directorate of Forensic Science Laboratory Conference Hall-ah a vawi 3-na atan an thukhawm a. Meeting-ah hian Home Minister Pu Lalchamliana, LR&S Minister Pu Lalruatkima, Chief Information Commissioner Pu Lalnunmawia Chuaungo, Chief Secretary Pi Renu Sharma bakah Boundary Committee Member dangte leh ramri chungchanga mithiam sawm bikte an tel a ni.

Boundary Committee Chairman Dy. Chief Minister Pu Tawnluia chuan Member leh sawm bikte lawmna thu sawiin meeting koh a nih chhan leh thurel tur tlangpui a sawifiah a, hemi hnu hian Pu John Neihlaia, IGP (HQ), Mizoram chuan ramria Police awmte dinhmun leh law and order dinhmun report a pe a, Home Secretary, Boundary Committee Member Secretary ni bawk Pu Vanlalngaihsaka'n member-te sawiho tur Discussion Paper leh sawrkar laipuiin hmarchhak State hrang hrang ramri buai zirchiang tura a ruat Manohar Parrikar Institute for Defense Studies and Analyses (MP-IDSA)Team hnena thehluh tur Draft Approach Paper sawizauna a nei zui a ni.

Uluk leh chipchiar taka sawihona neih a nih hnuah Mizoram-Assam ramri chinfelna tura hmalak kawngah ‘Inner Line of 1875’ ah an la din reng thu tarlan niin ramri buai chingfel tur hian State pahnihte chu political-level ah inbiakna neih (political dialogue) tha an ti tlang a ni.

MP-IDSA Team in tun thla tawp lama Mizoram an rawn tlawh huna thehluh tur Draft Approach Paper pawh chipchiar taka sawiho niin belh ngai leh paih ngaite bakah ngaihdan hrang hrang sawiho a ni.

Home Minister Pu Lalchamliana chuan khaikhawmna hun hmangin member ten rilru leh ngaihtuahna nasa taka senga thahnem an ngaihnaah lawmawm a tih thu a sawi a, rawtna hrang hrangah a tha ber tur ang zela kan hriata kan kal hi a pawimawh a, a tul anga in pawhfan theih zel a pawimawh a ni, a ti a. State pahnihte political-level a an inbiak a pawimawh bakah MP-IDSA Team lo kal hun atan tha taka kan lo inbuatsaih a pawimawh hle a, hemi atan hian theihtawp kan chhuah a ngai a ni, a ti a. Assam lamin an chan lamah hmasawnna hnathawh a thulh bik si loh avangin Mizoram lam pawhin hmasawnna hna thawh thulh bik lo turin vawiin khan Kolasib leh Mamit DC te hrilh an nih thu a sawi bawk.

Chief Secretary Dr. Renu Sharma pawhin Mizorama a hna a rawn zawm tirh atangin uluk takin ramri chungchang a zirchian nghal char char thu a sawi a, Mizoram mipuite, mipui aiawh pawl hrang hrangte, political party hrang hrangte leh Mizoram sawrkarte ramri chungchanga an inlungrual thap chu a lawmawm takzet tih sawiin, Mizoram tana tha ber tura theihtawp chhuaha tan lak a nih tur thu a sawi a ni.

Boundary Committe thukhawm hmasa ber hi July ni 30, 2021 khan neih a nih a, thutkhawm vawi 2-na hi September ni 7, 2021 khan neih a ni.

Boundary Committee in vawiin meetinga a thurelte hi Mizoram sawrkarah thlen leh tur a ni.