1980/2026-2027

Lawngtlai, 28th August, 2026 : Vawiin chawhnu dar 1:00 PM khan Lawngtlai Bawrhsap Pu Donny Lalruatsanga kaihhruaiin Kawlchaw West behchhana ramdang miten sumdawnna an kalpui chungchangah thutkhawmna neih a ni.

Pu Donny Lalruatsanga chuan kalkhawmte hnenah lawmthu a sawi  hmasa a. Sumdawnna chungchangah a ram leilungfa, dan hnuaia LADC in phalna a pekte tan chauh  a nih thu sawiin, kawng engkimah dan anga kal a pawimawh hle a ti a. LADC huamchhung atanga Myanmar -a bungraw thawnluh thinah fimkhur thar a tul hle a, Dan in a phalte chauhin sumdawnna an kalpui a tul hle a ti a. Bawrhsap chuan ramdang miten sumdawnna an lo kalpui ve ngawt a thianglo tiin LADC thuneitute hnenah pawh  thil awmdan a lo sawipui tur thu a sawi a ni.

He hun ah hian Kawlchaw West VC leh Tlawmngai pawl aiawhte an tel a. Kawlchaw West - ah hian tun dinhmunah VC ten an chhinchhiah danin Raltlan In - 47, Mihring - 222 an awm mek a, VC ten an chhinchhiah nilo mi - 30 vel an awm bawk niin khawtlang hruaitute chuan an sawi a.Raltlan nilo, ramdang mi ten  Kawlchaw West behchhanin sumdawnna an kalpui nia hriat chungchangah khawtlang hruaitute chuan theih ang anga hmalak a nih tur thu an sawi a. Thutkhawmah hian Kawlchaw West behchhana, Myanmar-  a lut tur sumdawnna kalpui mekah khawtlang hruaituten dan phalloh a awm leh awmloh te ngun zawka  lo thlithlaiin, an khawtlangah inkaihhruaina mumal zawk  lo siam se an ti a ni.

Thutkhawm ah hian Addl.DC, Addl.SP, SDO (S), BDO Lawngtlai RD Block, GS CYLA, VC member leh NGO Kawlchaw West aiawh te an tel a, Bawrhsap chuan lawmthu sawiin thutkhawm hi a khar.