323/2026-2027

Lawngtlai, 29th April 2026: Vawiin khan Pu Donny Lalruatsanga bawrhsap leh Chairman, Lawngtlai District Level Committee on Drug Free District- nibawk hovin BDO Conference Hall, Sangauah 'Drug Free District Campaign' neih a ni a, Pu Thomas Maratha Hlychho BDO Sangau chuan hun a kaihruai.

Pu Donny Lalruatsanga chuan Nasha Mukt Bharat Abhiyan-hnuaiah Ruihhlo umbo tura beihpui thlakna pawimawh tak ' Drug Free District Campaign' hawnna Lawngtlaiah neih lo nitawhin, Mizoram sawrkar pawhin 'Operation Jericho' chak takin a kalpui mek a ni, a ti a. A bik takin Sangau RD Block huamchhunga khaw hrang hrangte chu ruihhlo tihrêm kawngah tha thlah lo a, thahnem ngai taka thawk chhunzawm zel turin a sawm a. Ruihloin mimal, chhungkua, khawtlang bakah ram leh hnam a tichhiat nasat zia chhûtin, sawrkar leh VC,NGO,Kohhran bakah mipuiten tha thlah lo a thawh dun zel a pawimawh dawn hle tiin thawhpuiah a sawm a ni.

Bawrhsap chuan 'Drug Free Campaign' chu Sangau RD Block bakah Bungtlang 'S', Chawngte leh Lawngtlai RD Block - ah te neih leh ni tur a nih thu a tarlang a. Lawngtlai District- atanga ruihhlo umbo turin khaw hrang hrang an pawimawh dawn hle tih sawiin, khaw tinte mahni huamchhungah theuhah thahnem ngai taka thawk turin a fuih a. Ruihhlo awm lohna khuaa puan ngam ni thei tura chak zawka hmala turin khaw tin te a chah a. Tun atanga thahnem ngai taka ruihhlo do a nih loh chuan kan tu leh fate tan a chhenfakawm khua leh tui, ram nuam zawk siam theih a ni lo tih tarlangin, khua atlai hmaa harha ke pen thar turin khawtlang hruaitute a fuih a. Ram leh hnam himna, hmasawnna leh parchhuahna turin ruihhlo umbo a pawimawh hle tih tarlangin, Pu Donny Lalruatsanga chuan kawng hrang hranga ruihhlo do pui tur leh sawrkar lo thawhpui tlat turin kalkhawmte, Sangau RD Block hnuaia khawtlang hruaitute leh mipuite a sawm nghal bawk.

Pu Jammy Vanhmingliana SDC chuan Power Point Presentation pein, ' Drug Free District Campaign' kalpui dan leh hmalakna tur kawng hrang hrangte sawizauna a nei a. Thutkhawmah hian Ruihhlo do chak zawka kalpui dan tur, hmalak ngaihna kawng hrang hrangte leh harsatna awm thei te sawiho a ni a. Ruihhlo do kawngah theihtawpa hmalak thar chu hna hmasaah neih ni se an ti a. Tun dinhmuna sawrkar hmalakna kawng hrang hrangte fakawm an tih thu sawiin, theih ang angin sawrkar tawiawm leh thawhpui tlat ni se an ti a. Drug Free District Campaign- kaltlanga ruihhlo um bo turin, VC, YLA, Kohhran leh mipuiten theihtawp chhuah ni se an ti a bawk a ni.

Vawiin hun hmannaah hian Sangau RD Block hnuaia VC, YLA , LWA hruaitute  leh SIB - te an telkim tha hle a, Pu Thomas Maratha Hlychho chuan lawmthu sawiin hun a khar.