248/2026-2027

Lawngtlai, 23rd April, 2026 : Vawiin khan District Child Protection Unit, Lawngtlai bultumin Mission Vatsalya hnuaia 'Sensitisation Programme for Parents of Beneficiaries' chu LADC Hall- ah neih a ni a. Pu Donny Lalruatsanga, Lawngtlai Bawrhsap leh Chairman, SFCAC nibawk chuan khuallian niin a hmanpui.

Pu Donny Lalruatsanga chuan kalkhawmte chibai bukna a nei hmasa a. Mission Vatsalya- kaltlangin naupang kum 18 hnuailam, tanpui ngaite kawng hrang hranga tanpui an nih thu tarlangin, hei hian naupangte enkawl, humhim, hriselna tha pek leh nun kawng tha zawk zawh tura kaihhruai kawngah rah tha tak a chhuah mek zel a ni, a ti. Nuapang kaihhruai kawngah Nu leh pa te an pawimawh hle tih tarlangin, an hlimna, himna, hriselna leh than len kawngah thiam taka enkawl a pawimawh hle tih a sawiin, hemi kawnga thanhnem ngai thar turin a fuih a. Sawrkarin naupangte tan a hmalakna kawng hrang hrang a kalpui mekah Lawngtlai District - ah pawh tha taka kalpui a nih theih nan District Administration chuan theihtawp a chhuah zel tur thu a tarlang a ni.

Bawrhsap chuan Sponsorship dawng turte chu uluk taka thlan thin an nih angin, a dawngtute pawhin a hmanna tur dik taka an hman a tul hle a ti a. Tanpuina sum leh pai chu zirna emaw hriselna lam leh damloh nikuaa inentirna atan te a pek a nih angin, a hmanna tur ang taka hmang fo thin turin a chah a. Ho lam taka sum leh pai khawhral a nih loh nan Department hnuaia thawktute chu sponsorship dawngtute vil kawngah tan la thar turin a fuih nghal bawk.

Vawiin hun hmannaah hian Pi Saimawii Sailo, Protection Officer(NIC) chuan “Mizoram Guidelines for Sponsorship of Children,2017" tih thupui hmangin zirtirna a pe a, Pi R.Lalnunzawmpuii, Counsellor, chuan “POCSO Act, 2012" leh " Sexual Grooming” tih thupui hmangin zirtirna a pein, Pi R.Lalramdinthari, Chairperson, Child Welfare Committee pawhin 'Digital Literacy, Cyber Security,Child Marriage' leh 'Parenting skills' tih thupui hmangin thusawina a nei bawk.

Pu Frankie Vanlalhmangaiha, Social Worker chuan hun kaihruaiin, Pi Mary Lalremruati, District Child Protection Officer (DCPO)  chuan kalkhawmna chibai bukna a nei a. Pu K.Lalliantluanga, Legal cum Probation Officer, chuan lawmthu sawina neiin hun a khar.