247/2026-2027

Dated Champhai, 23rd April 2026 : Aizawl South III bialtu MLA Pi Baryl Vanneihsangi chuan vawiin khan Thangtea Hall, Champhai Kahrawtah Mizoram Hmeichhe Insuihkhawm Pawl (MHIP) Sub-headquarters Champhai Conference vawi 18-na chu khuallian niin a hmanpui a. MHIP General Headquarters President Pi Lalliani chu khual zahawm a ni.

Khuallian Pi Baryl Vanneihsangi chuan he hun ropui tak a tel thei hi lawmawm a tih thu a sawi a, MHIP-in an lo dawnsawn dan ropui a tih thu a sawi bawk. MHIP member nih chuan lawm niah te Mizo kawr mawi tak tak kan inbel thin a, a hmuhnawm rual rualin nitin nun, Mizo kawr inbel loh lai pawha MHIP member nihna nena inmil nun mawi leh hawihhawm tak vawng tlat turin mipui te a sawm a, vawiin ni hian hmasawnna a hrin chhuah ngei theih nan kalkhawm te'n thu tha hawna nunpui theuh turin a chah a ni. Mizoramah chuan rawngbawlna a pawimawh a, MHIP member te chuan chhungkuaa rawngbawlna hi an ngaih pawimawh a tul thu a sawi a, fate zirtira kaihhruai that hi khawtlang leh ram tana an thil tih theih hlu ber a ni tih a sawi. Sualna hneh tur chuan mi sualte kan hmangaih hmasak a tul a, hmangaihna atangin tanpui duhna thinlung a chhuak thin tih sawiin kan rama zu leh ruihhlo ngawl veite ngaihvena hmangaih turin a sawm bawk. MHIP hian Mizoram tana a rawngbawlna leh a thil tha tih zawng zawng a chhunzawm zel theih nan duhsakna a hlan a, lawmna thilpek MHIP Sub-headquarters Champhai President hnenah a hlan bawk a ni.

He hun hi MHIP Sub-headquarters Champhai President Pi Lalhmachhuani Varte chuan a kaihruai a, Secretary Pi C. Vanlalruati chuan MHIP thil tih report a pe a, khuallian Pi Lalliani'n thu a sawi bawk. Intihhlimna hun hlimawm tak hman niin MHIP Branch hrang hrang leh zaithiam milar te'n hun an rawn hmang a, chawhnuah Mizoram Journalists Association (MJA) Champhai tanpuinain MHIP Sub-headquarters Champhai hotu thar thlanna hun hman a ni.