2055/2026-2027

Lawngtlai, 3rd September 2026 : Vawiin khan Lawngtlai District Education Commitee bultumin DC Conference Hall-ah "Teachers' Day Felicitation Programme' hman a ni a. Bawrhsap leh Chairman District Education Commitee nibawk Pu Donny Lalruatsanga chuan hmanpuiin, Pu H.Laltanpuia, Addl. DPC Samgra chuan hun a kaihruai.

Pu Donny Lalruatsanga chuan kalkhawmte hnena lawmthu sawiin   Lawngtlai District- chhunga Zirtirtu zawng zawngte zahna chibai a buk a. Zirtirtute chu khawtlang leh ram hmasawnna tura lungphum pawimawh tak, zir thiamna piah lamah zirlaiten  nun dan mawi, nunphung tha leh hlawhtlinna tluantling an neih theih nan a theihtawp chhuahtu; zirlaite mipuitling tak taka  chhertu an nihna hi a zahawm em em a ni, a ti. Khawvel hnam changkang leh ropuite an dinchhuah chuan ber chu zirna an ngaihpawimawh vang a nih angin, dinhmun sang zawk thleng turin zirna lamah theihtawp chhuah a pawimawh hle a ni, a ti.  Zirtirtute chu an pawimawhna leh an hnathawh zahawmna hre reng tura chahin, ram leh hnam tana theihtawp chhuah chhunzawm zel turin a fuih a ni.

Bawrhsap chuan Zirtirtu tha tak tak zingah National leh State Teachers' Award- dawng thei an awm chu thinlung taka lawmawm a tih thu sawiin, vawiina chawimawina hlante thinlung taka a lawmpui thu a sawi a. Tunlai khawvel changkang zelah zirna pawh a inthlak nasa tawh hle a, khawvel inher danglam mila zirtirtute insiamrem a tul tak zet a ni, a ti. A bik takin 'Smart World' leh AI - khawvel a nih tawh angin, nitin mahni intahhriam a tul tak zet a ti a. Lawngtlai District- dinhmun thlirin zirnaah hmasawnna tur a tam hle a, literacy rate-  tha zawk nei turte, zirlaiten thiamna tak tak leh nunphung tha zawk an neihna turah Zirtirtuten mawhphurhna lian tak an nei tiin, Bawrhsap chuan hmangaihna nen thahnem ngai taka ram leh hnam tana thawkzel turin a chah nghal bawk.

Pu H. Laltanpuia chuan Teachers' Day puala chawimawina hlante chanchin leh ram leh hnam tana an hnathawh tlangpui tarlanna neiin,  Bawrhsap chuan pawisafai leh  Citation  - hlanna a nei a.  Chawimawina hlante chu a hnuaiah hian tarlan a ni.

1.Pu H.Thanghmuna, National Teachers' Awardee

2. Pu Lalmuana, National Teachers' Awardee

3. Pu H.Hranglina, State Teachers' Awardee

4. Pu H.Zohmingthanga, State Teachers' Awardee

Awardee - te hian hian thutawi sawina an nei bawk a ni.

Vawiin hun hmannaah hian Lawngtlai District Education Commitee- te an tel kim tha hle a, Pi Malsawmtluangi, Superintendent, DC Office chuan lawmthu sawiin hun a khar.