1874/2025-2026

Lawngtlai, 13th October 2025: Vawiin khan 'Bawrhsap Award' chungchangah Pu Donny Lalruatsanga, Lawngtlai Bawrhsap chuan Lawngtlai khawpui chhunga Village Council (VC) te kawmna a Office Chamber-ah a nei.

Pu Donny Lalruatsanga chuan kal khawmte hnena lawmthu sawina a nei hmasa a. MJA - te nen thutkhawm neih tawh niin, Bawrhsap Award- in a tum ber chu khawpui dangte entawntlaka faina lama hmasawn a nih thu a tarlang a. He Award- hian inelna thianghlim leh tha siamin, nakin zela vengchhung fainaah kawng thui tak a sut a beisei tih a sawi a. Chenna In, school, kawngpui leh tuihawk luankawr vawn fai kawngah VC leh mipuite theihtawp chhuahpui turin a sawm a. Ran khuahkhirh kawngah ran vulhtuten uluk zawka an ran vulhte enkawl a tul hle a ti a. A bik takin Ui khuahkhirh kawngah thupek mumal tak chhuaha, khauh zawka hmalak a nih tur thu a tarlang. Bawrhsap chuan Motor parking chungchangah LADC- in Parking Area - a siam bakah lirthei dah thinte chungah dan anga hmalak a nih tur thu a sawi a. Ran khuahkhirh leh Motor parking- chungchangah thlatin endik tura hmalak a nih tur thu a tarlang a ni . Pu Donny Lalruatsanga chuan Lawngtlai khawpui thianghlim, fel fai leh chhenfakawm siam tura theihtawp chhuahpui turin VC leh mipuite a sawm nghal bawk.

Bawrhsap Award- hi Lawngtlai khawpui chhunga Village Council - 12 inelna tur a ni a, Award- hi kum tinin Republic Day ( 26th January) ah hlan thin a ni ang. He Award dawng tur thlannaa tehfung hrang hrang leh lawmman tur chu a hnuaiah hian tarlan a ni.

Tehfung
1. Veng chhung faina ( Side - drain, Kawngpui, Mimal leh Vangtlang hmunhma te)
2. Ran khuahkhirh that dan
3. Veng chhung Motor - parking felfai dan

Lawmman

Pakhat na : Rs. 1,00,000 + Trophy
Pahnih na : Rs. 70,000 + Trophy
Pathum na : 50,000 + Trophy
Consolation Prize : VC (Pakhat tan ) Rs. 20,000

Bawrhsap Award- dawngtu tur endik hna thawk tur hian Mizoram Journalist Association (MJA) Lawngtlai ruat an ni a, an ni hian thlatin endik hna an thawk dawn a ni.