5050/2025-2026

Lawngtlai, 30th March 2026 : Zanin dar 7:00 PM khan CEM, LADC leh DC Lawngtlai tangkawpa buatsaih 'Inter Department Friendship Futsal Tournament 2026' hawnna chu TVJ Futsal Ground, Council Vengah neih a ni a. Lawngtlai Bawrhsap Pu Donny Lalruatsanga chuan Khuallian niin 'Futsal Tournament' hi a hawng.

Pu Donny Lalruatsanga chuan kalkhawmte hnena lawmthu sawina neiin inpumkhatna awm tura lawm taka tournament- a hawn thu a sawi a. Mizoram sawrkar hnuaia department hrang hrangte leh LADC lama department - te nen a inpawhna tha zawk awm tura ruahman anih ang taka rah tha a chhuah a beisei thu a sawi a. Autonomous District Council awmnaah sawrkar kalphung tha zawk siam turin inunauna leh inpawhna tha tak a awm a pawimawh hle tih tarlangin, State leh LADC - te pheikhairual taka kal a tul hle a ni, a ti. LADC leh State sawrkar thawkho tura mimal taka ngaihtuahna a sen nasat thu sawiin bawrhsap chuan zanin hun hman chuan thil tha zawk a thlen ngei a beisei tih a sawi a. Sawrkar pahnih chak takin a enkawlna hnuaiah Lawngtlai District chuan faina leh thianghlimna kawngah rahbi thar a kai ngei dawn tih tarlangin, hemi atan hian 'Stand Up Lawngtlai ' tih chu kalpui a nih tur thu a tarlang a ni.

Khuallian chuan 'Traffic Management' kawngah thawhdunna tha tak a awm a tul hle a ti a. Thawhhona tha tak a awm chuan khawpui mite bakah zin vei vak mite tan kawng thawl leh tlan nuam zawk a thlen ang a ti a. Sawrkar hnathawh kawngah rinawmna nen mawhphurhna hlen chhuah a tul hle tih sawiin, mahni hna tha leh rintlak taka thawk turin a fuih a. A bik takin hun vawn that kawngah sawrkar pahnihte inelna tha tak nei tura a beisei thu tarlangin, Pu Donny Lalruatsanga chuan mipuite tana thawk an nihna hriaa Lawngtlai District - tan a theihtawpa thawk zel turin a chah nghal bawk.

Zanin hun hmanna hi Pu K. Lalthanzara, ES,LADC chuan kaihruaiin Pu MC Lalrokhuma, Principal, Govt. Lawngtlai College chuan hunserh a hmang a.  Pu C. Hrangthianga, EM LADC (i/c Sports) chuan kalkhawmte lawmna thu sawiin, Pu Joseph Lalhmingthanga Chinzah, Asst. Secretary, Organizing Committee chuan report pekna a nei a ni.