5051/2025-2026

Lunglei, 2026 Vau thla ni 30: Vawiin khan Lunglei District Bawrhsap Pi Navneet Mann hovin a hna thawh pindanah Revenue Branch official-te, National Highways & Infrastructure Development Corporation Ltd (NHIDCL) leh BRN Infrastructures Pvt Ltd ai awhte leh Lunglei Sub-Headquarters YMA hruaitute chuan Lunglei District chhunga national highway (NH) kawngpui zauh leh siam ṭhat hna kal mek dinhmun leh fur hmaa hna thawh tur hmachhawpte an sawi ho.

Bawrhsap Pi Navneet Mann chuan NH–54 leh NH–302 kawngpui siam ṭhat hna kal mekah chak zawka hna thawh a nih theih nan NHIDCL leh contractor-te chu an nawr reng thu leh harsatna hrang hrang avanga duh anga hna thawh chak theih loh te, khuarel thil avanga hna khaihlak te a awm ṭhin tih a sawi a. Fur a lo thlen leh mai dawn avangin hna thawh tur ngaih pawimawh hmasakte fur hmaa thawk turin ruahmanna siam a nih thu sawiin, hna thawktute chu tawngpawng nawr ringawt lovin, an thawh theih ngei tur chinah ruahmanna siampui a, an hna thawh dan vil leh en zui chu thil pawimawh a nih thu a sawi a. Kawng siam hna thawh chungchanga chanchin thar leh social media-a thu belh chian dawl lo a darh lohna tur leh mipuite'n kawng siam dinhmun leh ruahmanna te, hna thawh theih tur chin te chiang taka an hriat theih nan YMA leh MJA te nena ṭhut khawm chu koh a nih thu a sawi.

Assistant Commissioner (Revenue) Pi Jennifer Vanlalhruaii Pachuau chuan Lunglei District chhunga NH–54 leh NH–302 kawngpui siam hna kal mek dinhmun tlangpui a tar lang a. NH–302 hi kilometre 95.950-a thui niin, package 2-ah ṭhen a ni a. KM 52-a thui Package A (Hrangchalkawn–Phairuangkai)-ah hna 65.98% thawh zawh tawh niin, KM 43.950-a thui Package B (Chhumkhum–Tlabung)-ah hna 63.14% thawh zawh tawh a ni a. NH–54-ah Package 3, 4, 5 leh Package 6 ṭhenkhat, a zavaiin KM 147.211-a thui (Bungtlang–Thingfal) chu Lunglei District enkawlna hnuaia awm niin, hna 97% thawh zawh a ni tawh thung a. Hmun ṭhenkhata hna muan chhan leh hna thawh theih loh la awm chu ram lak leh zangnadawmna chungchanga buaina te, ram neitute leh a bul hnaia awmte lung awi lohna avanga ram buai ngaihtuah mek a nih vang te a nih thu tar lan a ni.

Hna thawktu BRNIPL te chuan Work Plan zulzuia an hna thawh dinhmun leh hmabak an neih dan te, fur hmaa hna an thawh theih tur chin te report-in, Sub-Headquarters YMA hruaitute chuan an ngaih pawimawh hrang hrangte an sawi bawk a. Theiriat leh Hrangchalkawn inkarah KM 2.500-a thui kawng luan (blacktopping) hna an thawh mek thu leh April thla chhunga zawh an beisei thu te, Theiriata T-Way Filling Station bula lei min nasatna laiah metre 100-a sei Retaining Wall siam leh kawng blacktop chu April thla chhunga thawh zawh hman an beisei thu te, hun awm dan azirin tuiluankawr (side drain) pawh siam nghal an tum thu te an sawi a. Lungpuizawla kawng laih zauh hna leh lungrem (breast wall) siam hna pawh an thawh mek thu leh April thla chhunga zawh an tum thu te, Phairuangkai lei siam ṭhat hna pawh thawh mek a nih thu te sawiin, Hauruang khaw chhunga hma lakna kal mek leh hma chhawpte an tar lang bawk.

Zobawk khaw chhungah hna hmabak a la tam tham deuh avangin fur hmaa thawh hmasak ngai laite chu Zobawk Joint YMA hnenah an ngaih pawimawh hmasak dan indawt (priority list) dil niin, Joint YMA duh dan mila contractor te'n hna an thawh theih dan tur ruahmanna chu he hunah hian tar lan a ni bawk a. Zobawk South-a Pu K. Lalpuia In leh Higher Secondary School junction inkar blacktop tur chu GSB phah ṭan a nih thu leh metre 120-a thui chu April thla chawhma lamah zawh theih beisei a nih thu tar lan a ni a. Pu Sangtea ram zawn chu zangnadawmna la pek fel loh a nih avangin kawng laih zauh belh ngai chu khawih theih a nih rih loh thu leh blacktop theih a la nih loh thu tar lan niin, kawng chhe zual thawm ṭhat nan GSB phah leh tuiluankawr tihfai a nih thu te, fur hma leh fur laiin a ṭul anga vil zui (maintain) reng tum a nih thu leh a laih belh hna chu fur zawhah ram a fel chuan thawh theih beisei a nih thu tar lan a ni a. Pu Ruatpuia In leh Pu C. Thlangliana In inkar chu ram lak chin pawn lam kawng chhaka awmte'n an in tana a him loh an hlauh avangin kawng laih zauh hna tihkhawtlai niin, kawng laih zauh hna hi thawh zawh a nih phawt loh chuan blacktop theih a nih loh thu leh fur laiin a ṭul dan anga vil zui reng tum a nih thu tar lan a ni.

Zobawk North-a Pu C. Vanlalbiaka In bul leh Zobawk South-a Pu T. Siamkima In bula lungrem (Retaining Wall) la thawh zawh lohte chu thawh chhunzawm a nih tur thu leh hmanrua chhek khawm a nih tawh thu te, April thla chhunga zawh hman beisei a nih thu te tar lan a ni a. Zobawk North thlanmual zawna breast wall siam tura rawtna chu contractor-te hna thawh tur pawn lam a nih avangin a tluana thawh theuh a nih loh thu te, lei min hlauhawmna lai zawn hmun khatah lungrem siam hna thawh mek a nih thu leh hmun khat dangah rem belh leh tum a nih thu te, April thla chhunga zawh tum a nih thu te tar lan a ni a. Zobawk South-a Pu Hmingchungnunga In bula kawng laih zauh ngai chu zangnadawmna pek aṭanga in rauhsan hun a khawtlai avangin fur hmain kawng laih, GSB phah leh lungrem siam te thawh zawh hman a nih tawh dawn loh avangin fur zawhah hna ṭan tura ruahman a nih thu tar lan a ni bawk.

He ṭhut khawmah hian contractor-te chu an hna thawh tur ruahmante chak taka bawhzui tura chah an ni a. Work plan an bawhzui dan leh an hna thawh dan hi April thla laihawl velah DC hovin a hmunah endik (spot verification kalpui) leh tura ruahman a ni.