2020/2024-2025

Lawngtlai the 12th September 2024: Vawiin chawhma dar 11 khan District Hub for Empowerment of Women (DHEW) District Programme Office (WCD) Lawngtlai bultimin 'International Literacy Day 2024 cum Felicitation Programme' hmanna inkhawm chu LADC Hall, Lawngtlai Council Vengah neih a ni a. Pu Cheemala Siva Gopal Reddy, IAS, Lawngtlai District bawrhsap chuan khuallian niin a hmanpui.

Pu Cheemala Siva Gopal Reddy, IAS chuan hun hlu tak senga he hun hmang tura lo kalte hnenah lawmthu sawina a nei hmasa a. 'International Literacy Day'  puala hun hman chu thil pawimawh tak a ni a, ziak leh chhiar thiam piah lamah hna tha zawk leh mihring tangkai tak ni tura zirthiamna pawimawh zia inhrilhhriatna tha tak a ni, a ti. He ni puala District Hub for Empowerment of Women (DHEW) District Programme Office (WCD) ten  'Essay' leh 'Slogan' hmanga intihsiakna siamah thupui atana  'Importance of Girl's Child Education' thlanchhuah a ni hian thil tamtak a hril a ni, a ti a. India ram chu mipa dah chungnungna (Patriarchal Society)  a nih avangin hmeichhiate dinhmun a hniam thin hle a, zirna kawngah pawh an dinhmun a thalo hle thin a; Sawrkarlaipuiin theihtawp a chhuah hnuah erawh hmeichhiate chuan hmasawnna hrang hrang neiin,  dinhmun  tha tak tak an thleng ve thei ta  ni,  a ti. Hmeichhiate zirna tha kan pek hian  intluktlanna thlenin, hmasawnna kim chang zawk a awm thin tih tarlangin bawrhsap chuan hmeichhiate dinhmun chawisang zel turin theihtawp chhuah a ngai a ti. Zirna kawngah chauh ni loin, eizawnna kawng hrang hrangah hmeichhiate hi mipa ang tho a chhawr tlaka siam  turin  intluktlanna a awm a ngaih thu sawiin bawrhsap chuan kawng engkima mipa leh hmeichhiate inkarah intluktlanna siamtu nih i  tum theuh ang u tiin a sawm.

Bawrhsap chuan zirthiamna hian tlai luat a nei lo tih tarlangin, eng tik hunah pawh  bul tan hi a pawimawh ber a ti a. Zirna hian mihring a ti chak a, mahni ke a  ding thei  dinhmuna min siamtu a ni tiin zirna chu ngaihlut tur diktak a nih thu a sawi a. Zirthiamna hian hna tha tak min pe kher lo a nih pawhin mahni inrintawkna  bakah  khawtlang  leh ram tana mi tangkai takah min siam thin tiin, ngaihthah  mai chi a ni lo a  ti. Mizoram chu 'Literacy Rate'  ah sang viau mahse, Lawngtlai District bik a hniam fal hle tih tarlangin, hei hi thil veiawm tak a ni a, Lawngtlai mipuiten theihtawp a beihpui thlak a ngai a ti a. Literacy Rate-  tha tak nei turin Sawrkar chauhin tih theih a nei lo tih sawiin, Zirtirtu, Nu leh pa, ram hruaitu , NGO leh Kohhranten tan lak tlan a ngai  a ni, a ti. Zirthiamna tha tak naupangteah tuh  a nih chuan ramin hma a sawn zel dawn tih sawiin, bawrhsap chuan zirna  in hma a sawn theihna tur leh ram leh hnamin hmalam hun eng tak a neih theih nana  theihtawp chhuahpui turin kalkhawnte leh Lawngtlai mipuite a sawm nghal bawk.

Vawin "International Literacy Day cum Felicitation Programme"  puala  inkhawmah hian thupui thlanchhuah ' Importance of Girl's Child Education' tih thupui hmanga High School leh Middle School- te tan a  ' Essay' leh Primary School- te tan a 'Slogan & Drawing ' Competition buatsaih lawmman semna hun hman  nghal a ni a. Pu Cheemala Siva Gopal Reddy,  Lawngtlai District bawrhsap chuan lawmman hi a sem a, lawmman dawngtute chu a hnuaiah hian tarlan a ni.

High School Section:
1. Lalremruata (Class -X) Ngurnunsangi's  English School -  Rs.5,000
2. Jenifer Lalremruati (Class-IX) Don Bosco School -Rs.3,000
3. Lalrambeiseisangi (Class-X) Downtown English School - Rs. 2,000

Middle School Section:
1.Lalhruaitluangi (Class-VIII) Pm Shri Model English School - Rs.5,000
2.Joyful H.Vanlalroluahpuii (Class-VIII) Ngurnunsangi's English School -Rs.3,000
3 . Malsawmzuali (Class-VII)  Downtown English School -Rs.2,000
.
Primary School - Class Wise
1. Class-III : ML Junior English School.-Rs.15,000
2. Class-IV: PM Shri. Model English School-Rs.10,000
3.  Class-III : Jehovah Jireh  Higher Secondary School -Rs.8,000

Consolation Prize:
1. Class-II :  Golden Education Centre-Rs.5,000
2. Class-III : Downtown English School- Rs .5,000/-

Vawiin 'International Literacy Day cum Felicitation Programme' puala inkhawm hi Pu Z. Laldinzuala, SFL-DHEW, DPO (WCD) chuan kaihruaiin, Pi J.Lalremkimi, District Centre Administrator, Lawngtlai, chuan kalkhawmte hnena lawmthu sawina neiin hun a khar.

International Literacy Day hi kum 1967 atang khan kum tinin September ni -8  ah thupui hrang hrang thlanchhuah hmanga hman thin  a ni a. Kumin International Literacy Day -2024 atan hian thupuiah  " Promoting Multilingual Education: Literacy for mutual understanding and peace"  thlan a ni.