Nimin chawhnu dar 1 khan Lawngtlai DC Pu B. Lalhmingthanga MSC chuan Kawlchaw ‘W’ ah he khua leh a chhehvela lo neitute leh kuthnathawktu ten an thil dehchhuah an zawrhna tur Village Haat thar a hawng. Hawnna hun hi Lawngtlai BDO Pu T. Vanlalmalsawmsanga MCS in a kaihruai a. Dy Commissioner Lawngtlai leh Lai Autonomous District Council hnuaia mi pawimawh thahnem tak an tel a ni.

Village Haat hi SGSY Scheme atangin RD Block tinah 1 zel sak tura tih niin Lawngtlai RD Block chhunga sak nan Kawlchaw ‘W’ hi thlan a ni a. He Village Haat hi Mizoram Lei sei ber Lawngtlai District leh Saiha District inrina Chhimtuipui lei bula awm a ni a. 13.716m X 18.288m (45feet x 60 feet) a lian nin Rs. nuai 15 senga sak a ni a. January 2010 a sak tan niin March 2011 khan sak zawh a ni.

Lawngtlai DC Pu B. Lalhmingthanga chuan he Village Haat Kawlchaw ‘W’ leh a chhehvel khua 8 a Self Help Group te leh kut hnathawhtuten an thar chhuah an zawrhna hmun tur a ni, a ti a. Kut hnathawktuten lei rem an raha an lo dinchhuah ve na atan sorkar laipuiin SGSY Scheme hi a siam anih thu a sawi. SGSY Scheme tum tlangpui leh state danga an tih dan thate sawiin Mizote hian pawl anga eizawn kan zir thiam a tul tawh thu a sawi bawk. Mizoram sorkar Flagship Programme NLUP atanga sum sem mekah hian tanpuina hmu si a sorkar ruahmanna ti hloh chhamtu ni lo turin tanpuina dawng tuten tanlak a pawimawh thu a sawi bawk.