2031/2026-2027

Lawngtlai, the 1st September, 2026 : Vawiin chawhnu dar 2:00 PM  khan Bawrhsap leh Chairman, Lawngtlai District Sports Committee nibawk Pu Donny Lalruatsanga'n a Office Chamber - ah All Mizoram Inter Club Boxing Championship - a Lawngtlai District aiawh a kal SYS Boxing Academy Lawngtlai te lawmpuina thingpui  a inpui.

Pu Donny Lalruatsanga chuan Lawngtlai District - aiawha kal ' SYS Boxing Academy' ten lawmman tha tak  an lo hawn chu a chhuan thu leh thinlung taka a lawmpui thu a sawi a. District Sports Committee- hnuaiah Sports Discipline - hrang hrang inchhunkhawm a ni a, eng infiamna mai pawhin hmasawnna leh hlawhtlinna an neih theih nan tha thlah lova thawh reng a ni, a ti. Lawngtlai District- tan a 'Promotional  fund'  thehluh pawh Mizoram State Sports Council - in a pawm tawh tih sawiin, sum leh pai te hi tangkai leh awmze nei taka hman a ni ang a ti. Bawrhsap chuan tuna hlawhtlinna chan hi  duh tawk mai tur a ni lova, hei aia sang leh  hlawhtlinna tha zawk nei tura beih a ngai a ti. Hemi atan  hian tumruhna, thawhrimna, insumtheihna leh Ruihhlo laka fihlim te a pawimawh hle tiin, mahni inthunun fo turin a fuih a ni.

Bawrhsap chuan Sports Discipline-  hrang hrangah hian hlawhtlinna tur atam a, chutih rualin mahni tuina leh thiam zawng thlan thiam a pawiawmh hle a ti. A bik takin  boxing chu mizote thiam zawng tak a ni tiin,  hlawhtlinna chang tur erawh chuan kalkawng thui tak zawh tur a awm a, beidawng lova tumruhna nen thawh a tul tak zet a ti. Thalaite chu  infiamna hrang hrangah Lawngtlai District bakah Mizoram leh India ram thlenga hlawhtlinna chang thei an nih inhriaa, eizawnna tlak a awm tih hriaa hmalam pan zel turin a sawm nghal bawk.

All Mizoram Inter Boxing Club Championship- hi  Ni  17 atanga 21, August, 2026 chhung khan Aizawlaj neih a ni a, Lawngtlai District aiawh a kalte hi Pu Ramchullova, Coach,SYS Boxing Academy chuan hruaiin,   Lawmman lak dan chu a hnuaia tarlan ang hi a ni

1. Jeptha Lalnunhruaia- Gold Medal (30Kg Sub-Junior Boys),

2. Salomon Lalliansanga - Bronze (30-32kg Sun-Junior),

3.TC Vannunthara - Gold (48kg Sub- Junior),

4. B Malsawmsanga - Bronze (50kg Sub-Junior Boys),

5. B Lalramfangzauva - Bronze (54-57kg Junior Boys),

6. Chungneihkili -Gold  (54-57kg Sub- Junior Girls),

7. K Biakrempuii - Silver (48-50kg Junior Girls),

8. Bethseby Lalrotluangi - Gold (54-57kg Junior Girls)

SYS Boxing Academy aiawh hian Boxer-  9 kalin, Boxer-  8 in medal an hawn a, tun dinhmunah SYS Boxing Academy- ah hian Boxer - 35 an awm mek a ni.

Vawiin  huh hmannaah  hian Lawngtlai District Sports Committee- a Senior Vice-Chairman, Pu Elvis Lalthangzuala leh Vice-Chairman, Pu Vanlalruata, , ten telpuiin lawmpuina leh fuihna thu an sawi bawk.