2030/2026-2027

Aizawl, the 1st of September, 2026: Vawiin chawhnu dar 2:30 khan Labour, Employment, Skill Development and Entrepreneurship (LESDE) Department chuan Minister Pu Lalnghinglova Hmar hovin LESDE Directorate, MINECO, Khatla, Aizawl-ah Departmental Review Meeting an nei a. LESDE Department hnuaia hmalakna leh hmachhawp te, inkaihhruai dan hrang hrangte thlirletin hmasawn zelna turte sawiho a ni. He hunah hian Dr. Lalhriatzuali Ralte, Secretary, LESDE Department chu Convener a ni.

LESDE Minister Pu Lalnghinglova Hmar chuan kawng hrang hranga LESDE Department hmalaknate chu ṭha thawkhata a hriat thu sawiin, thawktute thawhrimna leh inpekna fakawm a tih thu a sawi a. “Sawrkarah chuan fimkhur taka kal a ngaih avangin muang ruih angin a lang thin. Kan kan kal dan ngai renga kan kal chuan result ngai reng kan nei dawn a,  a thenah chuan result tha zawk nei turin kal dan thlak hret a ngai maithei. Chumi tur chuan rilru leh tha sen belh hret pawh inhuam ila, kan zavaia kan thawh belh hlek chuan rei loteah department hmel thar tha zawk a lang ngei ang tih ka ring tlat a ni.” tiin department officer kalkhawmte a fuih.

Minister chuan ITI chu kutthemthiam zirna pawimawh a nih avangin tihchangkan lehzual a tul thu a sawi a. Mizoram Building & Other Construction Workers Welfare Board (MBOCWWB) lama labour cess tlingkhawm pawh danin a phal chhungah chak zawka hman dan ngaihtuah a ngai tih sawiin, “Welfare Board member-te tan hamthatna tamtak a awm a, hei hi a tam thei ang berin hria se kan duh a, theihtawpa tihlar zel kan tum. A bikin labour fate’n zirna leh eizawnna tha zawk an neih theihna’n nasa zawka hma lak kan tum a ni“ a ti a. Duh anga resource nei tha tawk lo chunga Mizoram Youth Commission (MYC) hmalakna chu lawmawm tiin, skill development-a result tha zawk nei turin thawhpui tur tha zawn peih a pawimawh thu a sawi a ni.

Secretary Dr. Lalhriatzuali Ralte pawhin department hmalakna lawmawm a tih thu a sawi a. Department hnuaia scheme hrang hrang tan helpline neih te, rampawna thawkte buaipuitu tur Overseas Employment Cell neih te a tul tawh thu sawiin, review meeting atanga hmachhawp awmahte mahni chanpual ṭheuh chak taka bawhzui turin thawktute a chah a ni. 

Meeting-ah hian Department hnuaia subordinate office hrang hrangte hnathawh dan leh kalpui mek program-te thlirho a ni bawk a. Thalaite hamthatna, eizawnna, skill development leh mahni kutkea dinna(entrepreneurship) kawnga Department hmalakna te chu chak zawka kalpui leh hmasawn zel dan tur ngaihtuahho a ni.

He meeting ah hian Directorate of LESDE, District Office te, (MBOCWWB), Mizoram Youth Commission (MYC), Government Industrial Training Institutes (ITIs) leh ESI Dispensary-te aṭangin hmalakna hrang hrang leh hmasawnna dinhmun Powerpoint Presentation hmanga thlirho a ni a. Thiamna sang zelah technology thar hrang hrang hmanga hmasawn dan tur leh thawhhona (collaboration) tha neih dan tur chungchang chu "New-age Technology – Prospects, Tie-ups & Way Forward" tih thupui hmangin sawiho a ni bawk. Presentation te ngaihthlak zawhah hmalak zel dan tur sawiho nghal zel a ni.

He meeting-ah hian Japan International Corporation Agency (JICA), Ministry of Skill Development and Entrepreneurship (MSDE) leh National Skill Development Corporation (NSDC) tanghoin a buatsaih project “Adviser for Technical Intern Training Programme/ Specified Skill Worker” hnuaia “JICA Invitation Programme to Japan” tour report neih a ni bawk.

Review Meeting-ah hian Department hnuaia iGOT Karmayogi Platform-a perform tha award leh best attendance certificate hlanna hun hman a ni bawk.

Minister leh Secretary ten concluding remarks an sawi zawhah Pu K.M. Lalrindika, Deputy Secretary, LESDE Department chuan lawmthu sawiin meeting khar a ni.