Vawiin hian Lawngtlai District NLUP Co-Ordination Committee Chairman, District Bawrhsap ni bawk Pu J. hmingthanmawia chuan DC Conference Hall-ah 2nd Phase NLUP a Auto Rickshaw dawngtute a kawm a, an harsatnate leh Free Service Camp neih dan tur a sawipui.

2nd Phase NLUP a Auto Rickshaw dawngtute hi Lawngtlai District ah mi 24 an ni a, heng zinga pathum te hi Lawngtlai khaw pawn lam mi niin khawchhungah mi 21 ten an dawng a, vawiina inhmuhkhawmna ah hian khawchhung atanga dawng mi 20 an lo kal thei a ni.

Thu sawiin Bawrhsap chuan NLUP hnuaia Rickshaw dawngtute chu Sawrkarin a enzui reng a ni tih hrilh in an harsatna te, an mamawh te ngaihtuah pui turin an in hawng reng a ni tih a hrilh a, a dawngtute pawh taima taka service tur leh an motor dawn a lo chhiat hnu pawha a dang lei leh thei tura inkhawlkhawm sauh sauh turin a fuih a, Saving Account la nei lo te tan MRB ah Account hawn dan tur a ngaihtuahpui theih thu a hrilh bawk.

Bawrhsap hian tun thla ni 31 hian Bajaj Dealer nena tangrual a NLUP Auto dawngtute tana Free Service Camp a buatsaih tur thu tarlangin Rickshaw neitute tana hun leh tha hek lo thei ang bera kalpui a nih tur thu a sawi a, he Service Camp hi Circuit House tualah neih tura ruahman a ni.

Rickshaw dawngtute tarlan danin a tlangpuiin mi pakhatin thla 1 ah Rs. 8,000 - Rs. 16,500 inkar an thawkchhuak a, Rickshaw an dawn hun nikum October 2013 atanga chhutin Rickshaw 20 te hian Rs. 28,37,750 vel an thawkchhuak tawh niin an in sawi. Heng zinga eng emaw zat te hian mumal takin an thawhchhuah sum an khawlkhawm thu an tarlang a, a thar dang leina man khawl tling hnai tawh te pawh an awm a ni. Rickshaw dawngtute hian thinlung takin sawrkar chunga lawmthu an sawi a ni tih Bawrhsap hi an hrilh.

He hunah hian District NLUP Nodal Officer Pu C. Lalsangluaia, Industries Officer Pu Rinawma leh NLUP District Media Officer Pu K. Saitluanga ten Bawrhsap hi an tawiawm a ni.