Mizoram Supply Accounts Service Association chuan vawiin khan Aijal Club-ah Special General Body Meeting an nei a. Meeting hawnna hunah hian Food Civil Supplies & Consumer Affairs Minister Pu John Rotluangliana chu Khuallian niin, FCS&CA Secretary leh Director ni bawk Pu R. Lalvena chu Khualzahawm a ni.

Minister Pu John Rotluangliana chuan Supply Department chhunga sum chevel buaipuitu ber an nih avangin Supply Accounts thawktute chuan an pawimawhna hria a, fimkhur taka thawk thin turin a fuih a. Supply Department chu Zoram mipui kil tin a fairelbel enkawltu a nih avangin, he Department a thawk- a te ber atanga a lian ber thlengin- tumah inthlahdah a, awm awl thei an awmlo a ni, Minister chuan a ti bawk. Posting and transfer chungchang sawilangin, khawi hmunah pawh awm se, sawi buai tum lovin tha taka thawk mai zel turin a chah a. Thawhhona tha tak an neih tlan zel theih nan leh, tihdikloh awm chang pawha infinchhuah tawn zel turin Minister chuan a sawm a ni.

Khualzahawm Pu R. Lalvena chuan accounts chinfel kawngah fimkhur a pawimawh thu sawiin, Supply Accounts thawktute chu dik taka thawk turin a chah a. “Audit huna thil diklo hmuhchhuah chu post-mortem report ang vel a ni” tiin, a siam that theih hun a awm laiin fimkhur taka hna thawk turin a hrilh a ni.

Vawiin meeting hawnna hunah hian Mizoram Supply Accounts Service Association chuan an member boral ta pahnih sunna hun an hmang a. Meeting hi session thum a then niin, session hnihna hi report pekna hun hman niin, session thumna-ah hian Service hruaitu thlanna leh hmalak zel dan tur relin hun hman a ni.