1012/2026-2027

Lawngtlai, the 15th. June, 2026 : Mizorama tlawmngaipawl lian ber, Young Mizo Association (YMA) Day vawi 91-na chu Chawngte 'P' Branch YMA buatsaihin Chawngte 'P' Mini Sports Complex- ah hman a ni a, Lawngtlai Bawrhsap Pu Donny Lalruatsanga chu khuallian nia hmanpuiin, LADC Executive Member, Pu HC. Lalengkima chu khualzahawm a ni.

Pu Donny Lalruatsanga chuan YMA Day- hmang tura kal zawng zawngte duhsakna chibai a buk a. Ram leh hnam humhalh tur hian do rawn tur pawimawh tak a awma, chu chu Rruihhlo do a ni a ti a. Khawvelin hnam huaisen tia a hriat thin 'Red Indian' hnam hi tunah hnam ang a hmuh tur an awm tawh lo a, a chhan chu ruihhlo in a tihchhiat vang a ni tiin, heihian Ruihhlo do a tul zia a tichiang hle a ti. Ruihhlo do kawngah sawrkar pawhin nasa taka hmalakna a kalpui mek tih sawiin, NGO leh khawtlang mipuite pawhin tha thlah lovin ruihhlo i do zel ang u tiin kalkhawmte a sawm a ni.

Khuallian chuan Mizoram chu ram leh hnam anga a dinchhuah a, hnam ropui tak a nih theih nan Zirna kawngah pawh tha thlah loa hmalak reng a tul thu a tarlang a. A bik takin thalaite chu hnam rohlu an nihna hre reng chunga zirna lama tha chhuah thar turin a fuih a ni. Khawvel hmasawnna kal mekah hnam ziarang chawinun a pawimawh hle a, hnam tawng te, zai leh lâm bakah zonun zemawi tak takte chhawm nung zel a pawimawh tak zet tiin, hnam chawinungtu leh hmasawnna thlentu nih tum theuh turin kalkhawmte a sawm nghal a ni.

Khualzahawm Pu HC. Lalengkima, EM,LADC chuan, Lawngtlai District- ah District Administration leh LADC inkarahah thawhhona tha tak a awm thu sawiin, ram leh hnam tana theihtawp an chhuah zel tur thu a sawi a. Kumina kangmei chhuak tur veng kawnga Lawngtlai District -in pakhatna dinhmun a hauh hian thawhhona tha a awm a tichiang hle a ti a. Mipui kalkhawmte chu tih tak takna nen a khawtlang hmangaih tur te, a tha zawnga midangte el thiam tur te, zirna leh thil hrang hranga tan la thar turin a sawm a. Khawtlangin hmasawnna a neih theih nan a michengte an pawimawh ber tih tarlangin, an thiamna leh theihna neihte lanchhuahtir zel turin khawtlang mipuite a chah bawk.

YMA Day hmanna inkhawmah hian zirna a hlawhtling Pu K. Lalruatliana, (MIS inziak tling), Pu . Krista Hmingropuia (HSSLC Top 10) leh Infiamna lama hlawhtling Pu Jeho Himnakulhpuingheta te chawimawina hlan an ni a .

Vawiin YMA Day lawmnaah hian Pu Lalnunpuia Renthlei, Chawngte SDO (C), Pu Malsawma, SDPO Chawngte, Pu Lalhruaizela, SDC leh khawtlang hruaitu pawimawh tak takte an tel a ni.