157/2026-2027

Lawngtlai, 15th April 2026: Vawiin khan Lawngtlai Bawrhsap kaihruaiin DC Office Chamber-ah Bangladesh rama sentut ( Measles) leng mek laka kan lo fihlim theih nan a inven dan leh lo inralrin dan tur chungchang ngaihtuaha thutkhawm neih a ni.

Pu Donny Lalruatsanga chuan kalkawhmte hnena lawmthu sawina a nei a. Sentût vangin Bangladesh ah tun thlengin nunna za aia tam chân a ni tawh tih tarlangin, lo inralrin leh tih tur tul ang angte lo tih lâwk chu hna hmasa neih a ngai hle a ni, a ti a. Lawngtlai District chu Bangladesh nen a ramri nei a nih angin hri lo leng lut thei reng a nih thu tarlangin, medical team bakah Lawngtlai mipuite lo in ralrin a tul tiin, fimkhur turin a chah a. A bik takin naupang kum 5 hnuai lamin an vei nasa thin tih tarlangin Bawrhsap chuan MR Vaccine- lâk a pawimawh tak zet tih tarlangin, Nu leh Pate chu an fate a hma lama vaccine lak tir theuh turin a chah a. Chak zawka invenna kalpui turin a hma lama Advisory chhuah turin Department hotute a chah a ni.

Bawrhsap chuan ramri a awm khuate an fimkhur zual a tul hle tih tarlangin, fimkhur kawngah khawtlang hruaitute theihtawp lo chhuah turin a ngen a. Khawsik, hritlâng awmna- hnaptui tla, leh mit sen, taksa a sena bawl chu a lanchhuana ber a nih angin hetiang natna vei an awm chuan a rang lama in entir turin a chah a ni. Natna darhzau lo tura a hma lama hriatchhuah chu thil pawimawh hmasa a nih tarlangin, hemi kawngah hian Health Department leh WHO - te theihtawp chhuah chhunzawm zel turin a chah a. Sentût leh natna dang laka inven nan District Level Task Force leh Block Level Task Force - ten a tul anga hma an lak mek thu a sawi a. Sentût vanga chiaia lo tura mipuite a chahin Pu Donny Lalruatsanga chuan District Administration - in theihtawp a chhuah zel dawn tih tarlangin,VC , NGO, Kohhran leh mipuite thawhpuina a sawm nghal bawk.

Dr. Lalmuanawma Jongte, Sr. Chief Medical Officer, chuan Sentût (Measles) leng mek laka lo inrâlrin dan tur sawizauna a nei a. Vaccine lak that chu invenna tha ber a nih thu sawiin, 95% sia tam MR Vaccine la ngei tura hmalak a tul thu a tarlang a. Vaccine chu naupang (9-12 months) leh (16- 24 Months) hnenah pek thin a ni a, dose hnih pek thin a ni a ti. Sentút chu Measles Virus - in a thlen thin tih sawiin, boruakah a leng thei tih rhiata fimkhur a tul hle a ni a ti. Sentût laka lo inven nan chak zawka surveillance kalpui a nih tur thu sawiin, PHC leh CHC ah Rapid Response Team tih nun vek tawh niin, , Mobile Vaccination Team - te pawh an inralrin tawh thu a sawi a. Tun dinhmunah MR Vaccine leh Vitamin A, mamawh zat kawl mek a nih thu a tarlang a ni.

Dr. Lalhlimpuii, WHO chuan an hmalak dan tlangpui sawizauna a nei a. Lawngtlai District - ah nikum January leh February thlaah Sentût a lo puang ve tawh tih tarlangin, theihtawp chhuah a nih angin nunna chân an awm lo a ni, a ti. Vaccine- la kimlo an awm thin tih tarlangin, hemi kawngah hian chak zawka hmalak mek a nih thu a sawi a. Kumin bikah sentût vei an awm lo tih tarlangin, theih ang anga hmalak chhunzawm zel a ni ang a ti. Dr. Remlalnghaki, DIO chuan April 2025- March 2026 chhunga nuapang kum khat hnuai lam MR1 leh MR2 vaccine lak dan leh HPV vaccine tlangpui tarlanna a nei a. MR1 lak a that viau laiin, MR2 - la an tlahniam hle tih tarlangin, hemi kawngah hian chak zawka hmalak mek a ni, a ti. HPV Vaccination bikah hmalakna kalpui mek a ni, a ti.

Vawiin thutkhawmah hian Sr. Chief Medical Officer,  Project Director (DRDO), Dy. CMO, DMS aiawh, SDO  (PHED), District Social Welfare Officer, District Civil Supplies Officer, Block Development Officer, President, CYLA, Bazar VC aiawh, UNDP aiawh leh   World Health Organisation (WHO) aiawhte an tel thei a. Pu Donny Lalruatsanga chuan lawmthu sawina neiin hun a khar.