156/2026-2027

Kolasib, 15th April, 2026: Vawiin khan Krishi Vigyan Kendra (KVK), Kolasib District buatsaihin Bilkhawthlir Kuhva Chingtu Pawl-te tan “Integrated Scientific Approach for Sustainable Arecanut Production in Kolasib District” tih thupui hmangin kuhva chingtute hnenah zirtirna pek a ni.

He hunah hian Khuallian, Kolasib Deputy Commissioner Pu H. Dolianbuaia chuan thu sawiin, kuhva chu Mizoram tana eizawnna kawnga innghahna ban pawimawh tak a nih thu leh, state economy chawikang theitu lian tak a nih thu a tarlang a. Kuhva chingtu kalkhawmte chu tangkai taka an hna thawk a, theihtawp chhuah zel turin a chah a ni. Hlawhtlinna tluantling zawk nei tur chuan mahni ngaihdan ngawt kalpui lova, mithiamte thurawn la thin turin a chah bawk a. Hemi kawnga KVK Kolasib-in kuhva chingtute tana tangkai tur zirtirna hun tha tak an buatsaih thei chu lawmawm a tih thu a sawi bawk.

He hun hi Dr. Michelle C. Lallawmkimi, Senior Scientist & Head, KVK Kolasib chuan a kaihruai a. Kalkhawmte chu KVK Kolasib-a mithiam, thiamna hrang hrang neite chu tangkai taka hmang a, anmahni rawn nachang hria a an thurawnte zawm thin turin a chah a ni. Mizoram Kuhva Chingtu Pawl (MKCP) Bilkhawthlir Branch President Pu K. Thanliana pawhin thu sawiin, pawl hmalakna leh an sum lakluh zat report a pe a. Hun rei tak ata an kuhva enkawlna lama harsatna an tawhte sutkian a nih theih nana KVK Kolasib-in zirtirna a lo pe thei chu lawmthu a sawi bawk a ni.

He training-ah hian KVK mithiam (expert) mi pali ten hlawm hrang hrangah thenin zirtirna an pe a. Hengte hi zirtirna pek a nih dan chu a ni:

1. PC Lalrintluanga, Subject Matter Specialist (Horticulture):"Sustainable production technologies of Arecanut with special reference to Kolasib district"

2. Dr. Carolyn Zothansiami, Subject Matter Specialist (Soil Science):"Optimizing soil health for enhancing productivity in Arecanut cultivation"

3. Esther Zonunpuii, Subject Matter Specialist (Plant Protection): "Epidemiology and management of major pest and diseases in Arecanut"

4. R Lalchhandami, Subject Matter Specialist (Agri. Engineering): "Role of Agriculture Engineering interventions in enhancing productivity and sustainability in Arecanut"

Zirtirna pek a nih hnu hian Farmer-Scientist interaction hun hman nghal a ni a, hetah hian kuhva chingtuten an kuhva enkawlna lama an harsatna tawhte zawhna siamin mithiamte nen sawihona hun tha tak an hmang a ni. He training kharna leh lawmthu sawina hi Pu Rualthantluanga, Fishery Specialist chuan a nei a ni.