No.1393/2020-2021

Vawiin khan Lawngtlai Bawrhsap Pi Shahshanka Ala, IAS leh Central Young Lai Association (CYLA) hruaitute chu CYLA office-ah inkawm hovin, COVID-19 hri leng dona kawnga hma lak dan hrang hrang an thlir ho.

Bawrhsap hi CYLA hruaitute chuan an President Pu J. Sangthangpuia hovin an lo dawngsawng a, Additional DC Pu K. Laltlawmlova leh DIPRO Pu C. Lalhruaitluanga te'n an tawiawm.

Lawngtlaia quarantine facility hrang hranga hman tur mutbu leh mamawh dang hrang hrang Lawngtlaia mi thahnem ngaite thawh khawm chu CYLA hma laknaa khawn khawm niin, he’ngte hi CYLA chuan vawiin khan District Level Task Force (DLTF) kutah an hlan a. CYLA President Pu J. Sangthangpuia kut atangin DLTF Chairman Pi Shashanka Ala chuan a lo dawng a ni.

Quarantine Facility-a hman tur Lawngtlai mipuite thawh khawm hi Pathianni atang khan CYLA hnuaia branch-te’n khawn khawm tanin, vawiina DLTF kuta an hlan laia lut tawh zat chu blanket 278, bedsheet 331, mattress 126, lukham 110, lukham kawr 42, thingpui no 35, tui no 20, bucket 13, thleng 2 leh insukna brush 1 a ni a. Pawisa fai Rs 7,500/- a lut tel bawk.

Vawiina an inkawm khawmnaah hian COVID-19 laka Lawngtlai District a him zel theih nana hma chhawp leh rawtna hrang hrangte sawi ho a ni a. State pawn atanga lo hawte lo dawnsawn dan leh khung hran chungchanga felfai zawk leh him zawka hma lak dan tur te, chanchin inhre pawh zung zung thei tura ruahmanna te, hriat lawk lohva state pawn atanga mahni lirtheia lo hawte’n harsatna an thlen loh nana Thingkaha check point dah a tul dan te sawi ho a ni a. CYLA hruaitute chuan COVID-19 dona kawngah theih tawpa sawrkar thawhpui zel an tum thu an sawi.