No.1392/2020-2021 

Task Group on Quarantine Facilities Chairperson, Pi Esther Lal Ruatkimi, Commissioner & Secretary, School Education & Tourism chuan mipui hnenah Sawrkar hmingin lawmthu a sawi.

 

Pi Esther Lal Ruatkimi chuan COVID-19 avanga ramin harsatna a tawh mekah Mizoram Sawrkar chuan LLTF te, VLTF te leh Kohhran hrang hrangte bakah mipuite hnenah lawmthu a sawi tak meuh meuh a. Tunah hian Mizoram pawn atangin mi singkhat chuang lo haw tur an awm mek a, Mizoram pumah Quarantine Facility hrang hrang mi 20000 len theihna tur mamawh a nih laiin tunah hian mi 14358 len theihna kan nei mek, a ti. Sawrkar building hrang hrang te bakah, Kohhran School hrang hrang te, Kohhran Hall hrang hrang te Quarantine Facility atan hman mek a nih thu leh Task Group on Quarantine Facilities chuan a dap belh mek thu Pi Esther Lal Ruatkimi chuan a sawi bawk.

 

Presbyterian Kohhran, Baptist Kohhran, Salvation Army, Lairam Isua Krista Baptist Kohhran, Evangelical Church of Maraland, United Penticostal Church (NEI) leh United Penticostal Church (MZ) hnuaia kohhran hrang hrang 168 ten an Kohhran Hall hman an remti  tawh a ni.

 

Quarantine Centre-a ei leh in man hi nikhat atan Rs.300 a ni a. Kohhran thenkhatin Sawrkar chhawk zangkhaiin, Quarantine Centre-a awmte tan ei leh in an lo tum sak a. Sawrkarin Kohhran hrang hrang hnenah lawmthu a sawi tak meuh meuh a ni. Heng bakah hian Hotel-a man chawia inkhunghrang an awm mek bawk.

 

Home Quarantine chungchangah hian screening test paltlang tawh, mahni ina room hrang leh inthiarna hrang nei thei tan home quarantine a theih a, Local Task Force te remtihna erawh a ngai thung. Mahni awmna District Deputy Commissioner-ah theuh dilna hi thehluh tur a ni.

 

Heng Quarantine Centre hrang hrang, Sawrkar leh Kohhran hmunhmaa khunghran (quarantine) mekte hi LLTF leh VLTF ten thahnemngai taka enkawla, theihtawp an chhuahnaah Mizoram Sawrkar a lawm tak meuh meuh tiin vawiin khan Task Group on Quarantine Facilities Chairperson, Pi Esther Lal Ruatkimi chuan thuchhuah a siam.

 

Attachment

  • Loading attachment...