Vawiin khan Lawngtlai District Land Owners Association (LDLOA)-in zangnadawmna an phut tihhlawhtlin nana KMMTTP kawngpui laih hna thawh chhunzawmtir phal lova an dan mek chungchangah, Lawngtlai Bawrhsap Dr Arun T., IAS hovin a pisaah inkawm hona buatsaih a ni a. LDLOA hruaitute bakah, Lawngtlai SP Pu Lalsanglura MPS, PWD MMPD-II EE Pu C.Lalhumhima, DCF (Wildlife) Pu PC Lalchhandama, SDPO Pu Victor Zothansanga leh SDC-te an tel.

He hunah hian LDLOA thil phut chungchang leh Lawngtlai Bawrhsapin a bawhzuisak dan leh a hma lakna te, sawrkar hotu lute hnena lehkha a thawn dan te sawi lan leh thlir ho a ni a. LDLOA hruaitute paw’n Bawrhsap hma lakna chu lawmawm an tih thu leh police leh a kaihhnawih department dang pawh zahawm an tih thu sawiin, an hma lakpuina chuan rah tha a chhuah ngei an beisei thu an sawi a. Hemi hnu hian an kal zel dan tur ngaihtuah turin an office lam an pan nghal a ni.

KMMTTP kawngpui laih mekin a pal tlang ram neitute zinga mi 160 vel chuan zangnadawmna la tawhin, la la lo mi 300 vel an la awm a. Ram neitute intel khawm LDLOA chuan zangnadawmna la pek bakte hi sawrkarin a pek thuai an phut a. He an thil phut hi an bawhzui reng laiin, an duh anga zangnadawmna an la hmuh kim theih loh avangin sawrkar nawr nan February ni 20, 2018 atang khan KMMTTP kawngpuia lirthei tlan leh kawng laih hna thawh mek chu an dang ta a ni.

 

Attachment

  • Loading attachment...