Vawiin chawhma khan ATI Auditorium-ah All Mizoram DRDA Employees Association (AMDEA) General Body Meeting vawi-2 na neih a ni a. Rural Development Minister Pu R. Lalzirliana chu Khuallian a ni.

Pu R.Lalzirliana chuan kalkhawmte hnenah chuan mi harsa zawk leh kuthnathawktute nel ber leh an duhzawng an lamna in nih avangin in hnathawh hi a pawimawh hle a ni tiin tawngkam hawihawm taka sawrkar pisa dawr tute chu be thin turin a fuih a.  Kan hna dik leh rinawm taka kan thawh a tul a ni, a ti a. Lehkha thiam vanga kuthnathawktute hmusit kan awm thin hi a pawi hle a ni, tiin kan ram hmasawnna atan kan thiamnate kan hman tangkai a ngai a ni, a ti a. Tumruhna leh taihmakna nena hnathawk turin kalkhawmte chu a chah a. Inhmuhkhawmna satiah mai ni lovin harsatnate sut kian dan tur leh hmalak dan tur te sawihoin tangkai taka hun hmang turin a chah bawk a ni.

AMDEA hi August 2016 khan din niin February Ni 16, 2017 khan General Body Meeting vawikhatna, Synod Conference Centre-ah an lo nei tawh a. AMDEA-ah hian member 117 vel an awm mek a ni.

DRDA Mamit AO, Pu R. Lalrinpuia chuan programme a kaihruai a. AMDEA President leh Aizawl DRDA, AO ni bawk Pu P.C. Lallawmkima chuan kalkhawmte lawmna thu a sawi a. AMDEA Asst. Secy Pi Evelyn Lalhmangaihi leh AMDEA Finance Secy Pu F. Malsawmtluanga atangin report ngaihthlak a ni a. Minister hian AMDEA Information Booklet tlangzarhna hun a nei a. Chawhnu lamah agenda hrang hrang sawihona in a chhunzawm ang.  Vawiin General body meeting-ah hian district hrang hranga DRDA hnathawkte an tel a ni.