Save Chite Lui Coordination Committee; INTACH, Mizoram Chapter leh Govt. Bethlehem Vengthlang High School tangkawp buatsaih Chite Lui Trekking for School Children chu vawiin khan Bethlehem Vengthlanga Chite Luikamah Pu C. Chawngkunga, Ex-MLA leh Co-Convener, INTACH, Mizoram Chapter-in a vailiam.

Pu C. Chawngkunga chuan Chite Lui chhanchhuak tur leh humhalh tura sawrkar leh mi thahnemngai tangkawpte hmalakna chu ropui a tih thu a sawi a. Save Chite Lui zawhah Save Tuirial, chumi hnuah Save Tlawng, a dawtah chuan Save Mizoram tiin hmachhawp kan siam tur a ni, a ti. ‘Smart City’ nei tur chuan a chhunga chengte rilru a ‘smart’ phawt a tul a, ‘Smart Citizen’ chuan Chite Luiah bawlhhlawh leh leivung an paih lovang a ti bawk. He hun hi Er. Dunglena, Working Chairman, SCLCC-in a kaihruai a. Pu C. Lalhluna, Headmaster, Govt. Bethlehem Vengthlang High School pawhin thu a sawi bawk a ni.

He Trekking hian a tum ber chu zirlaite hnena Chite Lui hmelhriat thar tir lehte, Chite Luiin chhiat lam a pan zel dan an mit ngeia hmuhtir leh chhanchhuah leh humhalh duhna thinlung puttirte a ni a. Sikul naupangte tan a huhova Chite Luidung zawhna hunah hian Govt. Bethlehem Vengthlang High School atangin Headmaster hovin zirlai 20 leh zirtirtu 3 an tel a. INTACH, Mizoram Chapter hotute leh Save Chite Lui Coordination Committee (SCLCC) hruaitute an tel bawk. Luidung hi Bethlehem Vengthlang kai atangin Ramthar Veng kai thleng zawh a ni.