2116/2025-2026

Lawngtlai, 12th September 2025: Vawiin khan Pu Donny Lalruatsanga, Lawngtlai Bawrhsap leh Lai Women Association (LWA) General Headquarters, Lawngtlai, hruaitute chuan DC Office Chamber-ah inkawmna hun an nei.

Pu Donny Lalruatsanga chuan LWA, General Headquarters hotute chibai buk na nei a. Lawngtlai District hmasawnna tura LWA - te hmalakna chhuanawm a tih thu tarlangin, hma lam hunah theihtawp chhuah zel turin a chah a. Sawrkar leh NGO-te chu innghêng reng an ni tiin, ram leh hnam, mipuite tana thawhho zel chu thil pawimawh tak a ni, a ti. Bawrhsap chuan Zirna kawngah, Ruihhlo do, Faina leh hriselna kawngah Lawngtlai District chuan hmasawnna tur a la ngah hle nia ahriat thu tarlangin hemi kawnga sawrkar thawhpui tlat turin LWA General Headquarters- hruaitute chu a sawm nghal a ni.

Pi V. Lalrinkimi, President, LWA, General Headquarters, chuan inhmelhriat tirna hun hmangin, LWA dinhmun leh hnathawh tlangpui- Tanpuingaite tanpui, hnam ziarang humhalh, hnam tawng thiam tura hmalak te a nih thu a sawi a.Sawrkar tha tichak tura LWA te an awm reng thu a tarlang nghal bawk.

Thutkhawmah hian thil pawimawh tak tak sawiho a ni a.Zirna kawngah tun aia tan lak a ngai hle tiin, hemi kawngah hian tha taka thawhho ni se an ti a. DEO leh Education Department, LADC- te nen thawhho ni se, a bik takin chhungkuaah Nu ten mawhphurhna a ngaiin, theihtawp lo chhuah thin se an ti a ni. Lawngtlai District - a Ruihhlo ngâi leh HIV/AIDS vei an tam lutuk chu veiawm an tih thu tarlangin, Sawrkarin leh NGO- ten theihtawp chhuah thin mahse, tun aia uar zawka hma lakho ni se an ti a. Chhungkuaah LWA ten theihtawp lo chhuah thin se, sawrkar hmalakna chu LWA ten chak takin lo bawhzui ve thin se an ti a ni.

Faina chungchang sawihona neiin, Mizoram District hrang hrangte nen kahikhina Lawngtlai District dinhmun a hniam hle chu veiawm tiin, hmalak a tul hle an ti a. Hemi kawngah hian chhungkuaah inzirtirna tha tak a pawimawh hle an ti a. Chhungkaw tinah Faina inzirtirna a tam thei ang ber a kalpui thin tura hmalak ni se an ti a ni. LWA General Headquarters - ten an vei tak Pakhat ' Old Age Home' chu Lawngtlaia din a nih theih nan theihtawp chhuah zel ni se an ti bawk a ni.

Vawiin thutkhawmah hian Lai Women Association (LWA) General Headquarters, hruaitute an tel kim tha hle a, Pu Donny Lalruatsanga chuan lawmthu sawina neiin hun a khar.

Lai Women Association (LWA) hi Kum - 1996 khan din niin, tunah hian Branch - 87,leh Sub- Headquarters - 4,  a awm mek a ni.