2117/2025-2026

Dated Lawngtlai, 12th September 2025: Urban Development & Poverty Alleviation (UDPA),Lawngtlai District bultimin vawiin chawhnu dar 2:00 PM khan 'Mizoram Cleanliness Competition 2025' September ni 17, atanga October ni 2, 2025 chhunga kalpui tur khuhhawnna leh hmalak dan tur ngaihtuaha thutkhawmna DC Conference Hall-ah neih a ni a. Pu Donny Lalruatsanga, Lawngtlai Bawrhsap chuan khuhhawnna hi a nei.

Pu Donny Lalruatsanga chuan kalkhawmte hnena lawmthu sawina neiin 'Mizoram Cleanliness Competition 2025' Lawngtlai District - a tha taka kalpui tura a hawn thu a sawi a. Faina kawngah Lawngtlai District- in hmasawnna tur a ngah hle tih tarlangin, lawmman lak ringawt ni lovin, fai hi changkanna a ni a theihtawp chhuah a tul hle a ni, a ti. Bawrhsap chuan ram changkang tehna ber pakhat chu fai leh thinghlimna a nih thu sawiin, ram leh hnam changkang ni turin theihtawp i chhuahho ang u tiin a sawm a. Dinhmun ngai renga awm chu hmasawnlohna a nih thu tarlangin, dinhmun sang zawka awm tura hmalak a tul tak zet a ti.

Bawrhsap chuan Faina Inelnaa tehfung hrang hrangah eng tehfung berah nge kan hnufual tih hre turin tehfung hrang hrangte zir chian a tul hle a ti a. Tehfunga hnufualna bikah theihtawp chhuaha hma lak a pawimawh hle dawn tih a tarlang a. Mizoram Cleanliness Competition- chu India ram khawpui fai inelna 'Swachh Survekshan' atana inbuatsaihna tangkai tak a nih bawk avangin Pu Donny Lalruatsanga chuan theihtawp chhuah turin kalkhawmte leh Lawngtlai mipuite a sawm nghal a ni.

Pi Margaret J. Vanlalremmawii, DPO, UD&PA, chuan Agenda sawifiahna neiin, hmalak dan tur sawihona neih nghal a ni a. Hnatlang rûnpui chu September ni 25, ah vêng tinah neih ni se an ti a. Mimal, Sawrkar leh vantlang ram fai taka enkawl nise tih niin, Zirna In zawng zawngah Awareness kalpui a, Zirna In leh a chhehvel tihfai ni bawk se an ti a. Vantlang zun In leh êk In tihfai leh thianghlim taka enkawl ni se, hman khat daih sarâng hmang lo tura inzirtirna uar tak kalpui bakah khauh zawka endik thin ni se an ti a.Tuihâwk luan kawr tha taka en kawl ni se, tui tling awm theihna ang angte endik a, a tul ang a hmalak ni se; Lawngtlai khawpui chhunga zirna In, Bazar hmunpui, Kawngpui leh a chhehvel, Sakhua biak In, Restaurants, Hotels, leh Office zawng zawngah faina kalpui ni se an ti a. Door- to - Door Awareness Drive - bikah chuan Self Helf Group - ten lo kalpui leh mai se tih niin, School, College, NGOs, NSS, NYKS leh vantlang mipuite nen tanghoin 'Swachhata Raliies' neih ni se tih a ni. Zirna In , Hnathawhna hmun leh mipuite punkhawmna hmunah te 'Swachhata Pledge' sawihhona neih ni se, Hriselna endikna ( Safai Mitra Suraksha Shivirs) pawh kalpui nise an ti bawk a ni. School, College leh mipuite pualin, faina chungchangah 'Painting Competition' buatsaih ni se tiin, Office, School, Restaurant, leh Hotel- bikah inelna siam ni se tiin, vêng tinah Participation Prize- siamsak nise an ti a. Thil pawimawh leh tul dang tih tur awm ang angte chu ziaka in pek leh ni se an ti bawk.

Vawiin thutkhawmah hian Superintendent of Police, Addl. DC, District Project Officer (DPO), UD&PA ,Executive Secretary (ES) LADC, Sanitation Officer, LADC, PHED,DEO, CMO- aiawh bakah Tlawmngai Pawl hrang hrang, Village Council ( VC) leh MJA, Lawngtlai ai awhte an tel thei a. Pu Donny Lalruatsanga chuan lawmthu sawina neiin hun a khar.